Հայաստանի կառավարութեան առընթեր գործող փտածութեան դէմ պայքարի խորհուրդը իր գործունէութեան մէկ տարուան ընթացքին քննարկման առարկայ դարձուցած է բաւական լուրջ հարցեր, որոնք օրէնքի նախագիծերու ձեւով պիտի ներկայացուին Ազգային ժողովի քննարկման:

Ազգային ժողովի նիստին այս յայտարարութիւնը կատարած է Հայաստանի արդարադատութեան նախարար Արփինէ Յովհաննիսեանը` պատասխանելով այս առնչութեամբ անկախ պատգամաւոր Էդմոն Մարուքեանի հարցումին:

Ան դիտել տուած է, որ խորհուրդը նոր մշակած է իր գործունէութեան ռազմավարութիւնը, որ նախատեսուած է 2015-2018 տարեշրջաններուն համար: «Այս պահուն մենք բաւականին լուրջ քայլեր իրականացուցած ենք, որոնցմէ մէկուն մասին կ՛ուզեմ մանրամասն խօսիլ: Մասնաւորապէս, լրագրողներու կողմէ յաճախ բարձրացուած է այն հարցը, թէ որոշ պաշտօնեաներ իրենց պաշտօնական յայտարարագիրներուն մէջ կը հրապարակեն կեղծ տուեալներ, կը թաքցնեն որոշ բաներ: Մենք այս հարցը լուծելու համար մշակած եւ կառավարութեան ներկայացուցած ենք օրէնսդրական նախաձեռնութիւն, որուն միջոցով նման դէպքերու համար սահմանած ենք վարչական պատասխանատուութիւն: Սակայն հիմա մենք կը քննարկենք նաեւ քրէական օրէնսգիրքին մէջ փոփոխութիւններ մտցնելու հարցը, որովհետեւ հաւանական է, որ նման դէպքերու պարագային յառաջանայ նաեւ քրէաիրաւական պատասխանատուութեան անհրաժեշտութիւն», նշած է նախարարը:

Յովհաննիսեան դիտել տուած է, որ իրենք ազնիւ են իրենց նպատակներուն մէջ` պատգամաւորներուն կոչ ուղղելով խորհուրդին նկատմամբ հասարակութեան մէջ անվստահութիւն չսերմանելու: Պատգամաւորը իր հարցումին մէջ նշած է, որ խորհուրդը «Եու. Էս. Էյտ»-էն 750 հազար տոլար գումար ստացած է, սակայն որեւէ էական քայլ չէ առած փտածութեան դէմ պայքարելու: Այս մասին «Արմէնփրես»-ին հետ խօսելով` Արփինէ Յովհաննիսեան ըսած է, որ կառավարութիւնը տակաւին այդ գումարը չէ ստացած: Ըստ անոր, այդ գումարները պիտի տրամադրուին անկախ փորձագէտներու ներգրաւման:

�