Շաբաթ, 19 դեկտեմբերին, Լոս Անճելըսի մէջ Թուրքիոյ հիւպատոսարանին առջեւ տասնեակներով հայ եւ քիւրտ երիտասարդներ բողոքի հաւաք մը կատարեցին` դատապարտելով Թուրքիոյ փոքրամասնութեանց դէմ շարունակուող հալածանքը եւ Անգարայի որդեգրած ծայրայեղական քաղաքականութիւնը:

Քրտական Ռոժաւայի զօրակցութեան մարմինին եւ Հայ երիտասարդաց դաշնակցութեան միացեալ ջանքերով կազմակերպուած սոյն ցոյցին ընթացքին, դատապարտուեցաւ յատկապէս քիւրտ մարդկային իրաւանց պաշտպան Թահիր Էլչիի վերջերս տեղի ունեցած սպանութիւնը` զայն նմանցնելով «Ակօս»-ի խմբագիր Հրանդ Տինքի սպանութեան:

«Բոլորս Հրա՛նդ ենք», «Բոլորս Էլչի՛ ենք» եւ «Բոլորս հո՛ս ենք» պոռացող ցուցարարները պարզեցին Հրանդ Տինքի, Ապրիլ 24-ին Թուրքիոյ բանակին մէջ սպաննուած Սեւակ Պալըքճըի, Թահիր Էլչիի եւ Թուրքիոյ իշխանութեանց այլ զոհերու լուսանկարները եւ պահ մը լռութեամբ յարգեցին անոնց յիշատակը:

Անոնք նաեւ լուսարձակի տակ առին Թուրքիոյ մէջ ներդրումները ետ քաշելու նպատակով` ՀԵԴ-ի սկսած #DivestTurkey արշաւն ու այն իրողութիւնը, որ Անգարա կը շարունակէ ահաբեկչական եւ ծայրայեղական կազմակերպութիւններուն նեցուկ կանգնիլ:

�