Սէուտական Արաբիոյ մէջ Ազրպէյճանի եւ Տաճիկիստանի դեսպանները յայտարարեցին, որ իրենց երկիրները կը սերտեն սէուտական ղեկավարութեամբ Իսլամական զինուորական դաշինքին միանալու կարելիութիւնը:

Սէուտական Արաբիոյ մէջ Ազրպէյճանի դեսպան Ռասեմ Ռզայեւ յայտնեց, որ Պաքու կը սերտէ Ռիատի առաջարկը եւ կը ջանայ Սէուտական Արաբիոյ հետ քաղաքական, ապահովական եւ տնտեսական մարզերուն մէջ համագործակցութիւնը ամրապնդել ռազմավարական մակարդակի վրայ:

Ան նշեց, որ Ազրպէյճանի արտաքին գործոց նախարարութիւնը այս առնչութեամբ յայտարարութիւն մը հրապարակած է` շեշտելով. «Մեր երկիրը կը զօրակցի ամէն տեսակի ահաբեկչութեան դէմ պայքարելու Սէուտական Արաբիոյ ուղղուածութեան, որովհետեւ ահաբեկչութեան դէմ պայքարը երկրին հետաքրքրութիւններուն մաս կը կազմէ»: Ան աւելցուց, որ Ազրպէյճան կը ձգտի Սէուտական Արաբիոյ հետ տնտեսական գործընկերութիւնը ամրապնդելու:

Սէուտական Արաբիոյ մէջ Տաճիկիստանի դեսպանը իր կարգին նշեց, որ իր երկիրը ներկայիս կը սերտէ Իսլամական դաշինքին միանալու սէուտական առաջարկը եւ ապագային այդ դաշինքին միանալու համար անհրաժեշտ միջոցառումները:

�