Իրաքեան լրատու գործակալութիւնը հաղորդեց, որ թրքական ուժերը մասնակի կերպով հեռացած են Մուսուլի շրջանէն: Թրքական աղբիւրներ «Հիւրրիյէթ Տէյլի Նիուզ»-ին յայտնեցին, որ Պաաշիքայի ճամբարին մէջ հաստատուած զօրքերուն մէկ մասը փոխադրուած է հիւսիսային Իրաքի մէջ Քրտական ինքնավար շրջանի կառավարութեան վերահսկողութեան տակ գտնուող շրջան:

Ըստ աղբիւրներուն, զինուորները 14 դեկտեմբերին հեռացած են ճամբարէն, սակայն ներկայիս Թուրքիա պիտի չվերադառնան: «Հիւրրիյէթ Տէյլի Նիուզ» կը նշէ, որ այդ քայլը առնուած է Պաղտատի կողմէ բուռն հակազդեցութեան լոյսին տակ միջազգային ընտանիքին կողմէ Անգարայի ճնշումի ենթարկուելէն ետք:

Թուրքիոյ վարչապետ Ահմեթ Տաւութօղլու նշեց, որ «հիւսիսային Իրաքի Մուսուլ քաղաքին մօտ գտնուող մեր ուժերուն հարցով նոր դասաւորումներու համար անհրաժեշտ քայլերը առինք»` աւելցնելով. «Իրաք գտնուող մեր ուժերը պիտի շարունակեն (այստեղ մնալ) զինուորական մարզումներու համար»:

Իրաքի քարիւղի նախարար Ատել Ապտելմահտի յայտնեց, որ Մուսուլի մէջ իր զինուորական ներկայութեան համար Թուրքիան պէտք չէ նկատել «թշնամի», եւ անոր հետ առեւտրական ու տնտեսական յարաբերութիւններու խզումը ճիշդ պիտի չըլլայ:

Ան նշեց, որ Անգարայի հետ յարաբերութիւններու խզումը Իրաքի գերիշխանութեան պահպանման համար օգտակար չէ` աւելցնելով, որ Թուրքիոյ նկատմամբ իրաքեան կառավարութեան որդեգրած քայլերը հաւասարակշռուած ու ճիշդ են: Ան յայտնեց, որ Թուրքիոյ` առանց Պաղտատը տեղեակ պահելու իր զինուորներն ու հրասայլերը Իրաք ուղարկելը անընդունելի է, եւ որեւէ կառավարութիւն չի կրնար ատոր նկատմամբ լուռ մնալ:

�