Թուրքիոյ վարչապետ Ահմեթ Տաւութօղլու յայտարարեց, որ Անգարա չի պատրաստուիր ռուսական օդանաւի վար առնուելուն համար ներում հայցելու Ռուսիայէն:

«Մեր օդային սահման ներխուժած եւ անյայտ պատկանելիութիւն ունեցող օդանաւին դէմ մենք իրաւունք ունինք կիրարկելու պաշտպանութեան միջազգային իրաւունքները: Ոչ ոք կրնայ ատոր համար մեղադրել Թուրքիան: Եւ թող ոչ ոք ատոր համար Թուրքիայէն ներումի հայց սպասէ: Մենք ներում պիտի չհայցենք մեր սահմանները պաշտպանելու համար», ըսաւ Տաւութօղլու, որ պաշտօնական այցելութեամբ կը գտնուի Ազրպէյճան:

Ան Ռուսիոյ նախագահ Վլատիմիր Փութինի եւ ռուս մնացեալ ղեկավար անձնաւորութեանց կոչ ուղղեց` խնդիրը քննարկելու դէմ առ դէմ հանդիպումի ընթացքին:

Անդրադառնալով ռուսական կողմէն հնչեցուած այն մեղադրանքին, որ Թուրքիան կ՛աջակցի ՏԱՀԵՇ-ին, Տաւութօղլու նշած է, որ եթէ ատիկա իրականութիւն է, ապա ինչո՞ւ այդ մասին յիշած են միայն օդանաւին վար առնուելէն ետք:

Իրանի վարչակարգի շահերու ճշդման խորհուրդի ընդհանուր քարտուղար Մուհսեն Ռիտահի յայտարարեց, որ «ՏԱՀԵՇ-ի` Թուրքիոյ քարիւղ ծախելուն վերաբերեալ փաստաթուղթեր ունինք»` աւելցնելով. «Եթէ թրքական կառավարութիւնը տեղեակ չէ ՏԱՀԵՇ-ի Թուրքիոյ մէջ քարիւղ ծախելէն, ապա մենք պատրաստ ենք այդ առնչութեամբ բոլոր տեղեկութիւնները տրամադրելու»:

Մինչ այդ, Գերմանիոյ խորհրդարանը երէկ 598 երեսփոխաններէն 445-ի թեր, 146-ի դէմ եւ 7-ի ձեռնպահ քուէարկութեամբ հաւանութիւն տուաւ ՏԱՀԵՇ-ի դէմ պայքարին մէջ գերմանական բանակի առաքելութեան:

Այժմ այդ որոշումը պէտք է հաստատէ Պունտեսրաթը` Գերմանիոյ 16 դաշնակցային երկրամասերու ներկայացուցիչներու ժողովը: Կը նախատեսուի առաքելութիւնը շարունակել մինչեւ 31 դեկտեմբեր 2016, անիկա պիտի արժէ մօտաւորապէս 134 միլիոն եւրօ եւ ատոր պիտի մասնակցին 1200 զինուորներ:

Կը նախատեսուի, որ Սուրիա ուղարկուին 4-էն 6 «Թոռնէյտօ» տիպի հետախոյզ օդանաւեր: Բացի ատկէ, գերմանական յածանաւ մը Միջերկրական ծովուն մէջ պիտի աջակցի ֆրանսական «Շարլ Տը Կոլ» օդանաւակիրի գործողութիւններուն:

Միացեալ Նահանգներու արտաքին գործոց նախարար Ճոն Քերրի յայտնեց, որ «Սուրիոյ մէջ քաղաքականէն բացի այլ լուծում չկայ»` աւելցնելով. «Սուրիոյ շուրջ տարակարծութիւններու լուծման համար կարիքը կայ քաղաքական որոշումի»:

Ան ըսաւ, որ պէտք է գործակցիլ Սուրիոյ նախագահ Պաշշար Ասատը իշխանութենէն հեռացնելու համար` նշելով. «Ասատի իշխանութեան վրայ մնալը անընդունելի է»: Ըստ Քերրիի, «իր ժողովուրդը տեղահանելէն ետք Ասատի հեռացումը դարձած է պարտադիր»:

�