ԹԱՍՍ կը հաղորդէ, որ անցեալ կիրակի գիշեր Պելճիքայի մէջ ձերբակալուած են ահաբեկչութեան մէջ կասկածուող յաւելեալ հինգ անձեր:

Պելճիքական դատախազութեան ներկայացուցիչը նշած է. «Պրիւքսէլի եւ Լիեժի մէջ այս գիշեր տեղի ունեցած գործողութեան ընթացքին ձերբակալուած են յաւելեալ հինգ կասկածելիներ, այդպիսով անոնց ընդհանուր թիւը հասած է 21-ի»:

Նախապէս հաղորդուած էր, որ Պրիւքսէլի, Լիեժի եւ Շարլըրուայի մէջ տեղի ունեցած ոստիկանական գործողութիւններուն ընթացքին կարելի չէ եղած ձերբակալել Փարիզի մէջ ահաբեկչական յարձակումներու գործով գլխաւոր կասկածելի Սալապ Ապտեսլամին, եւ Սեն-Տընիի մէջ սպաննուած Հասնայի եղբայրը` Այիտ Պուլահսենին:

Պրիւքսէլի մէջ ահաբեկիչներու որոնման գործողութիւնները սկսած էին 22 նոյեմբերի երեկոյեան, երբ Պելճիքայի գաղտնի սպասարկութիւնը հաստատած էր ահաբեկչական վտանգի բարձրագոյն մակարդակը:

ԹԱՍՍ կը հաղորդէ, որ հակաահաբեկչական միջոցառումները կաթուածահար վիճակի մատնած են Պրիւքսէլը: Երէկ փակուած է մեթրոն, այդ պատճառով ալ քաղաքի բոլոր հիմնական մայրուղիները գործնականին մէջ կանգ առած են: Երկար խճողումներ ստեղծուած են Պրիւքսէլի արեւմուտքը, որովհետեւ չեղեալ նկատուած են նահանգէն մայրաքաղաք մեկնող միջքաղաքային փոխադրակառքի քանի մը ուղերթեր:

Բացի բոլոր ուսումնական հաստատութիւններէն, մանկապարտէզներէն եւ մեթրոյէն, քաղաքին մէջ փակ են բոլոր առեւտրական կեդրոնները եւ բազմաթիւ խանութներ` բացի մթերային խանութներէն, չեն աշխատիր ժամանցի հաստատութիւնները, գրադարանները, մարզադաշտերը, լողաւազանները եւ նոյնիսկ որոշ սրճարաններ: Ինքնաշարժներու սեփական արհեստանոցներու, սափրիչներու, լուացքի տուներու եւ այլ մանր ձեռնարկութիւններու բազմաթիւ սեփականատէրեր նոյնպէս նախընտրած են իրենց հաստատութիւնները փակ պահել:

Կրճատուած է Եւրոպական Միութեան Պրիւքսէլի կառոյցներուն` Եւրոպական յանձնաժողովի եւ Եւրոպական Միութեան խորհուրդի, ինչպէս նաեւ ՕԹԱՆ-ի կեդրոնի աշխատանքը: Նշեալ կեդրոններու ոչ հիմնական անձնակազմը փոխադրուած է ճկուն ժամանակացոյցի: Առաւել եւս ամրապնդուած են այդ կեդրոններուն անվտանգութեան ապահովման միջոցները, որոնք Պրիւքսէլի մէջ արդէն առաւել պաշտպանուածներն են Միացեալ Նահանգներու դեսպանատունէն ետք:

«Սփութնիք» կը հաղորդէ, որ Պելճիքայի ներքին գործոց նախարար Եան Եամպոն յայտարարած է, որ իր երկիրը չի բացառեր, որ իր զինեալ ուժերը կրնան միանալ Սուրիոյ մէջ ՏԱՀԵՇ-ի դէմ գործող միջազգային դաշինքին: «Ես չեմ փակեր դուռը, սակայն ատիկա պէտք է կատարել դաշինքին հետ եւ միջազգային որոշման գոյութեան պարագային», ըսած է ան «Էր.Թէ.Էլ.» պատկերասփիւռի կայանէն` պատասխանելով Սուրիոյ մէջ ՏԱՀԵՇ-ի դէմ զինուորական գործողութեան Պելճիքայի հաւանական մասնակցութեան մասին հարցումին:

Ըստ Եամպոնի, այդ որոշումը կրնայ որդեգրուիլ յառաջիկայ օրերուն, «սակայն յստակ է, որ բուն խնդիրը Սուրիոյ մէջ է, եւ զայն պէտք է լուծել այդտեղ»:

�

�