«Արմէնփրես» կը հաղորդէ, որ Իրաքի Մուսուլ քաղաքին մէջ Թուրքիոյ նախկին հիւպատոս, ընդդիմադիր Հանրապետական ժողովուրդի կուսակցութեան երեսփոխան Օզթուրք Եըլմազ թրքական «Այ.Էմ.Սի. Թի.Վի.»-ին հետ ունեցած հարցազրոյցին ընթացքին յայտարարած է, որ Թուրքիան պէտք է համակերպի Սուրիոյ մէջ քրտական ինքնավարութեան ստեղծման հաւանականութեան հետ եւ ատոր համապատասխան քաղաքականութիւն վարէ տարածաշրջանին մէջ:

Մեկնաբանելով Անթալիոյ մէջ Քսաններու խմբակի վեհաժողովէն եւ Վիեննայի մէջ տեղի ունեցած հանդիպումներէն ետք սպասումները` թուրք երեսփոխանը ըսած է. «Ամենայն հաւանականութեամբ Սուրիան պիտի վերածուի դաշնակցային պետութեան, եւ Թուրքիան պէտք է ատոր համապատասխան քաղաքականութիւն զարգացնէ»:

Անդրադառնալով սուրիացի քիւրտերու Ժողովրդավարական միութիւն կուսակցութեան ներկայ վիճակին` Եըլմազ ընդգծած է.«Ներկայ պայմաններուն մէջ տարածաշրջանին մէջ Ժողովրդավարական միութիւն կուսակցութիւնը Միացեալ Նահանգներու եւ նոյնիսկ Ռուսիոյ դաշնակիցն է»:

Ան համոզում յայտնած է, այն մասին, որ մօտիկ ապագային անխուսափելի է նախագահ Պաշշար Ասատի պատուիրակութեան եւ Ժողովրդավարական միութիւն կուսակցութեան միջեւ բանակցային հոլովոյթը:

«Սուրիան ամենայն հաւանականութեամբ պիտի վերածուի դաշնակցային պետութեան: Ժողովրդավարական միութիւն կուսակցութեան վերահսկողութեան տակ գտնուող տարածքը ձեռք պիտի բերէ Հիւսիսային Իրաքի քրտական տարածաշրջանին նման ինքնավարութիւն: Կրնայ ըլլալ, որ Սուրիան բաժնուի նաեւ այլ ինքնավարութիւններու», ըսած է Եըլմազ` նշելով, որ Անգարան ստիպուած է համակերպիլ այդ զարգացման հետ եւ համապատասխան քաղաքականութիւն որդեգրել:

�