Փերինչեք Ընտրութիւններուն Քուէներ
Ստանալու Համար Կը Շահարկէ Տինքի Անունը
«Արմէնփրես» կը հաղորդէ, որ Թուրքիոյ մէջ տեղի ունենալիք խորհրդարանական ընտրութիւններէն առաջ Տողու Փերինչեքի ղեկավարած «Վաթան» կուսակցութիւնը սկսած է շահարկել Հրանդ Տինքի անունը` ընտրութիւններուն քուէներ ստանալու համար:

Կուսակցութիւնը փողոցներուն մէջ կը փակցնէ պաստառներ Հրանդ Տինքի լուսանկարով եւ կը մէջբերէ ժամանակին Միացեալ Նահանգներու մասին անոր հետեւեալ խօսքը. «Այս Ամերիկան կու գայ իր հաշիւները կ՛ընէ, իր գործին կը նայի, իսկ երբ գործը կ՛աւարտի, կը քաշուի, կ՛երթայ»:

Յիշեցնենք, որ վաղը Թուրքիոյ մէջ տեղի պիտի ունենան խորհրդարանական արտակարգ ընտրութիւններ:

Թուրքիոյ մէջ օգտագործուելու նպատակով տպագրուած է 75 միլիոն 288 հազար 955 քուէաթերթիկ: Թուրքիոյ մէջ ընտրութիւններուն պիտի մասնակցի 54 միլիոն 49 հազար 940 մարդ, իսկ արտասահմանի մէջ` 2 միլիոն 899 հազար քաղաքացի:

Թրքական «Հիւրրիյէթ» օրաթերթը հաղորդեց, որ ըստ ընտրական կեդրոնական մարմինի եւ հարցախոյզի ընկերութիւններու տեղեկութեանց, գոյութիւն ունի այն մեծ հաւանականութիւնը, որ խորհրդարանական ընտրութիւններուն մասնակցութեան համեմատութիւնը մեծ աճ արձանագրէ:

Ըստ հարցախոյզի ընկերութիւններուն, այդ համեմատութիւնը պիտի ըլլայ 86 առ հարիւր, իսկ ըստ ընկերային եւ քաղաքական հետազօտութեանց «Քոնտա» ընկերութեան` 91 առ հարիւր:

�