29 հոկտեմբեր 2015-ին Փարակուէյ վերածուեցաւ հարաւամերիկեան եօթներորդ երկրին, որ օրէնսդիր իշխանութեան մակարդակով ճանչցաւ Հայոց ցեղասպանութիւնը, հակառակ դիւանագիտական աշխուժ լոպիինկին, որ թուրք-ազրպէյճանական ժխտողականութիւնը գործի դրած էր մայրաքաղաք Ասունսիոնի մէջ վերջին քանի մը տարիներուն եւ բազմացուցած իր ճիգերը մասնաւորաբար 100-րդ տարելիցի նախօրեակին»:

Այս բառերով Հայ յեղափոխական դաշնակցութեան Հարաւային Ամերիկայի Հայ դատի յանձնախումբը յատուկ յայտարարութեամբ մը ողջունեց Փարակուէյի Ծերակոյտին որոշումը, որ Յառաջդիմական ժողովրդավար կուսակցութեան անդամ ծերակուտական Տեզիրէ Մասիի նախաձեռնութեամբ ներկայացուած էր եւ արժանացած օրէնսդիր մարմինի միաձայն հաւանութեան:

«100-րդ տարելիցին, Հայ դատի յանձնախումբը վեր կ’առնէ քաջութիւնը, ճիգն ու յանձնառութիւնը բոլոր անոնց, որոնք այս որոշման ետին կանգնեցան եւ պատմական ճշմարտութեան ճանաչումը գերադասեցին ժխտողականութեան ճնշումներէն: Փարակուէյ կամովին կը միանայ ճշմարտութեան, յիշողութեան եւ արդարութեան կամար միջազգային պայքարին եւ կը դառնայ դրօշակիրներէն մէկը այդ պայքարին ներկայ եւ զօրավիգ Հարաւային Ամերիկային», կ’ըսուի յայտարարութեան մէջ:

Այս որոշումով, կ’եզրափակէ Հայ դատի յանձնախումբը, Փարակուէյ, Ուրուկուէյի, Արժանթինի, Չիլիի, Պրազիլի, Պոլիվիոյ եւ Վենեզուելայի քոյր հանրապետութիւններուն կողքին «կարեւոր ներդրում մը կը կատարէ պատմական արդարութեան վերահաստատման, մարդկութեան դէմ ոճիրներու ճանաչման, դատապարտման եւ կանխատեսումին, ինչպէս նաեւ ամէն ձեւի ժխտողականութեան դէմ պայքարի ազնիւ դատին»:

�