Գանատահայ բեմադրիչ Ատոմ Էգոյեանի նոր «Յիշէ՛» ֆիլմի անդրանիկ ցուցադրութիւնը պիտի կայանայ Սեպտեմբեր 10-­ին Վենետիկի միջազգային կինոփառատօնի ծիրէն ներս: Ինչպէս կը հաղորդէ «Արմէնփրես»-­ը` վկայակոչելով Armenien weekly-­ն, ֆիլմը ընդգրկուած է Վենետիկի 72­-րդ կինոփառատօնի հիմնական մրցոյթին: Կինոփառատօնի մեկնարկը տրուած է Սեպտեմբեր 2-­ին, եզրափակիչ ձեռնարկը տեղի պիտի ունենայ Սեպտեմբեր 12-­ին:

Մինչ ֆիլմի առաջին ցուցադրութիւնը ամերիկեան Hollywood reporter պաբերականի հետ զրոյցի ընթացքին Էգոյեան պատմած է, որ ֆիլմը Հոլոքոսթը վերապրածի մը մասին է, որ կը մարմնաւորէ Քրիստոֆըր Փլամմըրը: Անոր միջոցով բեմադրիչը մարդկութեան հետ կը խօսի ցեղասպանութիւններու, մարդկութեան դէմ յանցագործութիւններու եւ մարդու իրաւունքներու ոտնահարումներու մասին:

Էգոյեան պատմած է, որ ֆիլմը այդ ոճին մէջ առաջինը չէ, եւ ցեղասպանութիւններու մասին իր առաջին ֆիլմը` «Արարատ»-­ը կը պատմէ Հայոց ցեղասպանութեան մասին: Լրագրողի հարցումին կա՞ն արդեօք Փլամմըրի կերպարին մէջ ընդհանրութիւններ «Արարատ» եւ «Յիշէ՛» ֆիլմերուն մէջ, Էգոյեան ըսած է, որ անոնք երկու տարբեր կերպարներ են: «Սակայն հետաքրքրականը այն է, որ այս տարի հայ ժողովուրդը կ՛ոգեկոչէ Հայոց ցեղասպանութեան 100-­րդ տարելիցը եւ ես մարդկութեան դէմ յանցագործութիւններու մասին ֆիլմ մը ներկայացուցած եմ, որ ազգի պատմութեան, անցեալի, մարդոց յիշողութիւններու մասին է: Յիշողութիւնը միշտ կայ եւ մենք կը հասկնանք, թէ անոնք ինչպիսի ազդեցութիւն կը ձգեն սերունդներու վրայ»,- ըսած է բեմադրիչը­:

�