Սան Մարինոյի մէջ (հանրապետութիւն՝ Իտալիոյ հողերով շրջապատուած միջերկիր) պիտի կայանայ վախճանեալ ֆրանսահայ բեմադրիչ Հանրի Վեռնոյի «Մայրիկ» վէպի իտալերէն թարգմանութեան շնորհահանդէսը:

Գիրքի հիման վրայ նկարահանուած է նաեւ համանուն շարժապատկեր: Սան Մարինոյի ռատիօ-հեռատեսիլի փոխանցումով՝ շնորհահանդէսը պիտի կայանայ Սեպտեմբեր 30ին, մշակոյթի քարտուղարութեան եւ Հայաստանի դեսպանութեան հովանաւորութեամբ: Գիրքի իտալերէն թարգմանութիւնը 2015 թուականին ներկայացուած է նաեւ Թուրինի մէջ իրականացած Գիրքի միջազգային ցուցահանդէսին:

Ձեռնարկի մասին հաղորդագրութեան մէջ նշուած է.
«1915 թուականին Առաջին Աշխարհամարտէն սասանուած աշխարհը ցնցուեցաւ մէկ այլ սարսափելի ողբերգութեամբ, որ շուրջ 2 միլիոն հայու կեանք խլեց: Ողբերգութիւնը քանի մը տարի տեւեց, եւ անոր ծաւալները, ի վերջոյ, ահասարսուռ չափերու հասան: Այդ իրադարձութիւններուն շուրջ դեռ վիճաբանութիւններ կ՛ընթանան: Հայոց Ցեղասպանութեան 100ամեակի նախաշեմին՝ Հռոմի պապի խօսքերը միջազգային ուշադրութիւնը կրկին կեդրոնացուցին Հայկական Հարցին վրայ: Ի հարկէ, չէ՞ որ հարիւր հազարաւոր մարդիկ զոհուեցան, ամբողջական գիւղեր ջնջուեցան երկրի երեսէն, իսկ հրաշքով փրկուած հազարաւոր մարդիկ սկսան ապաստան փնտռելու ամբողջ աշխարհի մէջ:

Մշակոյթի քարտուղարութիւնը կը շարունակէ մեծ ջանքեր գործադրել՝ պատմական փաստեր տարածելով Սան Մարինոյի՝ իբրեւ հիւրընկալութեան եւ ազատութեան հողի մասին: Անիկա ընդունած է Հռոմէն փախած Կարիպալտիին, իսկ Երկրորդ Աշխարհամարտի տարիներուն՝ փախստականներու, զորս «Հարիւր հազար եղբայրներ» կը կոչէին: Նոյն ուժով հարկաւոր է աշխատիլ՝ երիտասարդներու մօտ պատմութիւնը ուսումնասիրելու եւ Հայոց Ցեղասպանութեան 100ամեակը յիշատակելու ձգտում յառաջացնելով:

«Մայրիկ» շարժապատկերի բեմագրութիւնը, զոր գրած է բեմադրիչ Հանրի Վեռնէոյ, նուրբ բանաստեղծութիւն է: Մարդոց կեանքին մէջ վեր կը յառնին ժողովուրդի ողբերգութեան պատմութիւնը եւ ամբողջ ժողովուրդի մը աւանդոյթները ոչնչացնելու մասին յիշողութիւնները»:�

�