Թրքական «Սթար» օրաթերթը կը հաղորդէ, որ Թուրքիոյ վարչապետ Ռեճեփ Թայիփ Էրտողան յայտարարած է, թէ մօտիկ ապագային կը պատրաստուի Կազա այցելելու:

Գերմանիայէն վերադառնալու ճամբուն վրայ Էրտողան պատասխանած է լրագրողներու հարցումներուն: Անդրադառնալով Իսրայէլի հետ յարաբերութիւններուն` ան յայտարարած է, որ Թուրքիոյ հետ յարաբերութիւնները կարգաւորելու համար Իսրայէլ պէտք է կատարէ Անգարայի երեք պահանջները:

«Թուրքիան այդ պայմաններէն որեւէ մէկէն պիտի չհրաժարի: Թուրքիա կը պահանջէ փոխհատուցել իր 9 քաղաքացիներու ընտանիքներուն, ներում հայցել իրմէ եւ վերցնել Կազայի շրջափակումը», ըսած է Էրտողան:

Ան նշած է, որ բազմաթիւ երկիրներու ղեկավարներ, ներառեալ` վերջին հանդիպումին ընթացքին Գերմանիոյ վարչապետ Անկելա Մերքել ուզած են Իսրայէլի եւ Թուրքիոյ միջեւ յարաբերութիւններուն միջնորդել եւ կը փորձեն համոզել, որ Անգարան համաձայնի կատարել միայն երկու պահանջ` ներման հայցում եւ փոխհատուցում, եւ մոռնայ Կազայի հատուածի շրջափակումը վերցնելու հարցը: Սակայն, Էրտողանի պնդումով, Անգարա բոլոր երեք պայմաններուն վրայ կը պնդէ, եւ Թուրքիա չի կրնար լուռ հետեւիլ, թէ ինչպէ՛ս Իսրայէլ շրջափակման մէջ կը պահէ Պաղեստինի բնակիչները