Միացեալ Նահանգներու ելեւմուտքի նախարարութեան կողմէ Հըզպալլայի առնչուած եւ Մարատա հոսանքի ղեկավար Սլէյման Ֆրենժիէն ներառող պատժամիջոցներու հաստատումէն ետք, Միացեալ Նահանգներու արտաքին գործոց նախարարութիւնը եւս յայտարարեց. «Պատժամիջոցներ հաստատեցինք Հըզպալլայի դաշնակից լիբանանցի պաշտօնատարներու վրայ` պետութեան իշխանութիւնը կանոնաւոր կերպով սահմանափակելնուն համար»:

«Հըզպալլայի դաշնակիցներուն գործունէութիւնը կ՛ամրապնդէ համակարգը զուգահեռ իշխանութեան, որ Լիբանանը տկար եւ պառակտուած կը պահէ», նշեց նախարարութիւնը:

«Հըզպալլան Լիբանանի առողջացման մեծագոյն խոչընդոտն է եւ պետութիւնը մնայուն հակամարտութեան պատանդ կը պահէ», ըսաւ նախարարութիւնը:

Միացեալ Նահանգներու արտաքին գործոց նախարարութիւնը աւելցուց. «Շրջանին մէջ մնայուն խաղաղութեան հաստատման եւ Լիբանանի կայունութեան ու բարգաւաճման երաշխաւորման համար Հըզպալլան պէտք է զինաթափուի»:

Նախքան այդ, Միացեալ Նահանգներու ելեւմուտքի նախարարութիւնը հաղորդագրութիւն մը հրապարակելով յայտարարեց, թէ նոր պատժամիջոցներ կը հաստատէ «Հըզպալլայի դաշնակից պաշտօնատարներու, կուսակցութեան առնչուած գործարքներու, ինչպէս նաեւ ելեւմտական ցանցին մաս կազմող անհատներու եւ ընկերութիւններու դէմ, կուսակցութեան Լիբանանի մէջ եւ անկէ դուրս օգտագործած ելեւմտական կառոյցին վրայ ճնշումը բարձրացնելու նպատակով»:

Միացեալ Նահանգներու ելեւմուտքի նախարարութիւնը յայտարարեց, որ պատժամիջոցները կը ներառեն Մարատա հոսանքի ղեկավար Սլէյման Ֆրենժիէն եւ Հըզպալլայի քաղաքական խորհուրդի անդամ Մահմուտ Քումաթին` զանոնք ամբաստանելով «լիբանանեան քաղաքական ու ապահովական հաստատութիւններուն մէջ կուսակցութեան ազդեցութեան ամրապնդման նպաստելու յանցանքով»: