Պիւյիւքտէրէի Ս. Հռիփսիմեանց Եկեղեցւոյ Թաղային Խորհուրդի նախաձեռնութեամբ, 26 Մայիս 2023, Ուրբաթ օր, համայնքային հինգ լիսէներու տասնըմեկերորդ դասարանի աշակերտներու մասնակցութեամբ տեղի ունեցաւ շրջապտոյտ մը։ Ն.Ա.Տ. Սահակ Բ. Պատրիարք Հօր օրհնութեամբ, աշակերտաց խումբին մաս կազմեց Հոգշ. Տ. Յարութիւն Վրդ. Տամատեան։

Սոյն այցելութիւնը եզակի նշանակութիւն ունէր, քանի որ Պատրիարք Հօր օրհնութեամբ, բոլոր լիսէներու մասնակցութեամբ կ՚իրականանար եւ մօտաւորապէս 200 հոգինոց աշակերտաց խումբը կը ծանօթանար իր եկեղեցիին։

Խումբը, ժամը 09.00-ին համախմբուեցաւ Ղալաթիոյ Ս. Գրիգոր Լուսաւորիչ Եկեղեցւոյ մէջ։ Այստեղ խորհուրդի անդամներէն Լենա Ենիեորկան բացատրութիւններ տուաւ ծրագրի մասին։ Այստեղ կատարուեցաւ ուխտի աղօթք, որմէ յետոյ աշակերտաց խումբը կարգաւ այցելեց Պէշիկթաշի Ս. Աստուածածին, Օրթագիւղի Ս. Աստուածածին, Ենիգիւղի Ս. Աստուածածին եւ հուսկ՝ Պիւյիւքտէրէի Ս. Հռիփսիմեանց եկեղեցիները։ Իւրաքանչիւր եկեղեցւոյ մէջ խումբը դիմաւորուեցաւ եկեղեցիներու վարչութեան անդամներու կողմէ, ինչպէս նաեւ տրուեցան տեղեկութիւններ։

Պիւյիւքտէրէի այցելութիւնը առիթ եղաւ, որ երիտասարդներ եկեղեցւոյ պարտէզին մէջ զուարճանան եւ միասնաբար ճաշեն մինչեւ ժամը 15.00։
Այցելութեան աւարտին, աշակերտներ կատարեցին ուխտի աղօթք։ Այստեղ Հայր Սուրբը, շնորհակալութիւն յայտնեց ծրագրի կազմակերպիչներուն եւ աշակերտներուն։ Այս առումով Պատրիարք Սրբազան Հօր սէրն ու օրհնութիւնները փոխանցեց ներկաներուն։ Այցելութիւնը աւարտին հասաւ «Պահպանիչ» աղօթքով։