Երէկ, հաճոյքն ունեցանք խմբագրատանս մէջ հիւրընկալելու Իսթանպուլի նորընտիր երեսփոխան տքթ. Սեւան Սվաճըօղլուի կողմէ գլխաւորուած կուսակցականներու խումբը։ ԱՔ կուսակցութեան Շիշլիի մասնաճիւղի ղեկավար Կէօքհան Եիւքսելի առաջնորդած կուսակցականները եւ ընտրեալ-երեսփոխան տքթ. Սեւան Սվաճըօղլու ԺԱՄԱՆԱԿ-ի խմբագրատան երդիքին տակ հիւրընկալուեցան ջերմ մթնոլորտի մը մէջ։ Հանրապետութեան նախագահի ընտրութեան երկրորդ փուլին ընդառաջ անոնք փափաքած էին այցելել խմբագրատունս՝ մինչ ներկայիս կը սերտացնեն իրենց շփումներն ու համագործակցութիւնը համայնքային շրջանակներուն հետ։

Անշուշտ, այս փուլին իրենց զօրակցութեան կոչը, սպասումը յաչս մեր համայնքին ունի բաւական լաւ ու գործնականօրէն հիմնուած տրամաբանութիւն։ Արդարեւ, այս նոր շրջանին Ազգային մեծ ժողովի երդիքին տակ Սեւան Սվաճըօղլու պիտի ըլլայ թրքահայ միակ երեսփոխանը՝ մանաւանդ, որ մաս պիտի կազմէ մեծամասնութեան ճամբարին։ Սա Հանրապետութեան նախագահ Էրտողանի քաղաքական կամքին ու դրական վերաբերմունքին ի շարունակութիւն ապահովուած արդիւնք մըն է եւ մեր համայնքին առջեւ կրնայ նոր հորիզոններ ուրուագծել, յառաջիկայ շրջանին կրնայ առաւելութիւններ ապահովել առկայ խնդիրներու լուծման ճանապարհին։ Անշուշտ, այդ առաւելութիւններու ապահովման նախապայմանն է, որ շաբաթավերջի երկրորդ քուէարկութեան արդիւնքով ալ յառաջատար դիրքի վրայ գտնուի նախագահ Էրտողան եւ վերընտրուելով շարունակէ իր պաշտօնավարութիւնը։

Ընտրեալ-պատգամաւոր Սեւան Սվաճըօղլուի եւ Կէօքհան Եիւքսելի կողմէ գլխաւորուած կուսակցականներուն հետ երէկ խմբագրատանս երդիքին տակ ծաւալուած զրոյցն ալ այս տրամաբանութեան շրջանակին մէջ ընթացաւ։ Հիւրերը շեշտեցին, որ ԱՔ կուսակցութիւնն ու նախագահ Էրտողան միշտ յարգանքով կը վերաբերուին երկրի խայտաբղէտ պատկերին նկատմամբ ու միշտ կ՚առաջնորդուին այն սկզբունքով, թէ զանազանութիւնները հիմնական հարստութիւն կը համարուին եւ ընդհանուր միասնականութեան համար անհրաժեշտ նախապայմանն են։

Թէ՛ Սեւան Սվաճըօղլու եւ թէ Կէօքհան Եիւքսել հանդիպման ընթացքին նշեցին, որ նախագահ Էրտողանի վերընտրութիւնը պիտի բնորոշէ երկրէն ներս նոր ոստումի մը փուլը եւ յառաջիկայ ձեռքբերումներէն դարձեալ անմասն պիտի չմնան Թուրքիոյ հայազգի քաղաքացիներն ու ընդհանրապէս ոչ-իսլամ փոքրամասնութիւնները։