Ռուսիոյ արտաքին գործոց նախարարութեան պաշտօնական ներկայացուցիչ Մարիա Զախարովա երէկ յայտարարած է, թէ Ազրպէյճանը եւ Հայաստանը ընդունած են Ռուսիոյ մէջ հանդիպելու առաջարկը` քննարկելու կողմերուն միջեւ խաղաղութեան համաձայնագիրը: Յստակ ժամկէտները պիտի յայտարարուին, երբ ամէն ինչ վերջնականապէս համաձայնեցուած ըլլայ, նշած է ան:

«Մեր ջանքերը չեն թուլնար` բազմակողմանիօրէն աջակցելու համար Ազրպէյճանին եւ Հայաստանին նախապատրաստելու խաղաղութեան համաձայնագիրը այդ երկիրներուն միջեւ», ըստ «Ինթըրֆաքս»-ին ըսած է Զախարովա:

Հայաստանի արտաքին գործոց նախարարութենէն յառաջիկայ հանդիպման մասին մանրամասնութիւններ չյայտնեցին, բանբերը միայն նշեց, թէ նախարարի այցելութիւններուն ու հանդիպումներուն մասին պատշաճ ժամկէտին կը տեղեկացնեն:

Զախարովա նախանցեալ օրուան զինեալ ընդհարման մասին ըսած է, թէ տեղի ունեցածը անգամ մը եւս կը հաստատէ, որ Պաքուն եւ Երեւանը պէտք է փոխադարձաբար զսպուածութիւն ցուցաբերեն եւ անշեղօրէն հաւատարիմ մնան Ռուսիոյ, Ազրպէյճանի եւ Հայաստանի ղեկավարներու եռակողմ համաձայնութիւններուն:

Անոր համաձայն, նախանցեալ օրուան միջադէպի շրջանին մէջ գտնուող Ռուսիոյ զինուած ուժերու եւ սահմանապահներու ներկայացուցիչները անյապաղ կապուած են Հայաստանի եւ Ազրպէյճանի համապատասխան մարմիններուն հետ եւ լարուածութիւնը թուլացնելու միջոցներու ձեռնարկած են: