Հայաստանի արտաքին գործոց նախարարութիւնը կը տեղեկացնէ, թէ երէկ` 1 հոկտեմբերին նախարար Արարատ Միրզոյեան հեռաձայնային հաղորդակցութիւն ունեցած է Ռուսիոյ արտաքին գործոց նախարար Սերկէյ Լաւրովի հետ:

Քննարկուած են երկկողմանի օրակարգի հարցեր, որոնց մէջ` յառաջիկայ բարձր մակարդակի հանդիպումները: Պայմանաւորուածութիւն ձեռք բերուած է ընդլայնել միջգերատեսչական կապերը, մինչեւ 2021 թուականի աւարտը Տնտեսական համագործակցութեան միջկառավարական յանձնախումբի 20-րդ նիստ եւ միջշրջանային ֆորումի 8-րդ հանդիպում կազմակերպել:

Նախարար Միրզոյեան վերահաստատած է Հայաստանի պատրաստակամութիւնը` վերսկսելու Լեռնային Ղարաբաղի տագնապի խաղաղ լուծման լիարժէք հոլովոյթին` ԵԱՀԿ-ի Մինսքի խմբակի համանախագահութեան ներքեւ: