Այս խիստ բառերով իր ընդվզումը արտայայտեց Արամ Ա. վեհափառ հայրապետը «Սիլիսիա Թի. Վի.»-ին, կիրակի, 1 օգոստոս 2021-ին Անթիլիասի մայր տաճարին մէջ Պէյրութի նաւահանգիստի պայթումի զոհերու հոգիներուն համար կատարուած հոգեհանգստեան արարողութենէն ետք:

Կաթողիկոսը իր խօսքին մէջ շեշտեց. «Արդարութիւնը չի կրնար զոհը դառնալ քաղաքական նկատումներու ու անձնական հաշիւներու: Ինչ որ պատահեցաւ տարի մը առաջ Պէյրութի նաւահանգիստին մէջ, չի կրնար հեռու մնալ հաշուետուութենէ: Պատասխանատուները ժողովուրդին պէտք է հաշիւ տան` իրենց անպատասխանատու վերաբերումին համար: Պէյրութի նաւահանգիստի պայթումը ո՛չ միայն պատճառ դարձաւ հսկայ քանդումներու ու բազմաթիւ զոհերու, այլ նաեւ յստակօրէն պարզեց կարգ մը պետական պատասխանատուներու անփոյթ ու անխիղճ վերաբերումը` իրենց վստահուած պաշտօններուն նկատմամբ: Ժողովուրդը հաշուետուութիւն ու արդարութիւն կը պահանջէ»:

Նշենք, որ այսօր` երեքշաբթի, 3 օգոստոս 2021-ին, լիբանանահայութիւնը հրապարակային հանդիսութեամբ պիտի նշէ պայթումին տարելիցը, նաեւ մասնակից պիտի դառնայ 4 օգոստոսին նաւահանգիստին մէջ տեղի ունենալիք հաւաքական աղօթքին: