Հայաստանի նախագահի աշխատակազմի հասարակութեան հետ կապերու վարչութիւնը կը տեղեկացնէ, թէ քաղաքական ուժերու հետ իր նախաձեռնած քաղաքական խորհրդակցութիւններու շրջագիծին մէջ հանրապետութեան նախագահ Արմէն Սարգսեան երէկ հանդիպում ունեցած է ՀՅԴ Բիւրոյի նախագահ Արմէն Ռուստամեանի եւ ՀՅԴ Հայաստանի Գերագոյն մարմինի անդամ Արծուիկ Մինասեանի հետ:

Հանդիպումին անդրադարձ կատարուած է երկրին մէջ ստեղծուած ներկայ իրավիճակին, մասնաւորապէս` ղարաբաղեան տագնապի լուծման վերաբերեալ Հայաստանի վարչապետի, Ռուսիոյ եւ Ազրպէյճանի նախագահներու ստորագրած յայտարարութեան ու անոր դրոյթներուն:

Հիմնական պատասխանատու նկատելով գործող իշխանութիւնները` ՀՅԴ-ի ներկայացուցիչները իրենց անհանգստութիւնն ու մտահոգութիւնը արտայայտած են առկայ վտանգներուն վերաբերեալ, ներկայացուցած ստեղծուած իրավիճակի յաղթահարման իրենց տեսլականը:

Ընդգծուած է, որ ղարաբաղեան տագնապի` իբրեւ համազգային նշանակութեան հարցի լուծման շուրջ պէտք է ըլլայ համազգային համաձայնութիւն:

Նախագահ Սարգսեան ընդգծած է երկրի կայունութեան պահպանման, հասարակական համերաշխութեան եւ միասնականութեան կարեւորութիւնը: