Աւստրալիոյ մեծագոյն նահանգներէն մէկուն` Նոր Հարաւային Ուէյլսի Օրէնսդիր ժողովը 61 թեր ձայնով պաշտօնապէս ճանչցած է Արցախի Հանրապետութեան անկախութիւնը: Այս մասին կը տեղեկացնէ Աւստրալիոյ Հայ դատի յանձնախումբը:

Խորհրդարանականները դատապարտած են նաեւ Ազրպէյճանի եւ Թուրքիոյ կողմէ յարձակումները Արցախի բնիկ հայերուն վրայ:

– Քալիֆորնիոյ Ֆաուլըր քաղաքի քաղաքապետական խորհուրդը միաձայնութեամբ դատապարտեց Արցախի դէմ ազրպէյճանական բռնարարքները` միեւնոյն ժամանակ ճանչնալով Արցախի ինքնորոշման իրաւունքը եւ անկախութիւնը:

Արեւմտեան Ամերիկայի Հայ դատի յանձնախումբը կը տեղեկացնէ, որ քաղաքապետական խորհուրդը նաեւ կոչ ուղղեց Միացեալ Նահանգներու նախագահին եւ Քոնկրեսին, որ նեցուկ կանգնին Արցախի ազատութեան սատարելու գործին:

Քաղաքապետական խորհուրդի անդամ Գառնիկ Ղազարեան, որ ժողովին ներկայացուցած էր հռչակագիրը, նշեց, թէ հայերուն դէմ ցեղասպան պատերազմին ընթացքին Ֆաուլըր քաղաքը կանգնած է Արցախի կողքին:

– Արցախի արտաքին գործոց նախարարութեան հրապարակած հաղորդագրութեան համաձայն, Միացեալ Նահանգներու Նիւ Ճըրզի նահանգի Ֆորտ Լի քաղաքը դատապարտեց Արցախի վրայ Ազրպէյճանի յարձակումները եւ ճանչցաւ Արցախի ժողովուրդի ինքնորոշման իրաւունքն ու Արցախի Հանրապետութեան անկախութիւնը:

Քաթալոնիոյ Խորհրդարանը Ազրպէյճանի Կողմէ
Քաղաքայիններու Թիրախաւորումը
Դատապարտող Բանաձեւ Որդեգրած Է

Քաթալոնիոյ խորհրդարանը 21 հոկտեմբերին որդեգրած է յայտարարութիւն մը, որով կոչ կ՛ուղղէ` վերջ տալու Լեռնային Ղարաբաղի մէջ զինուորական գործողութիւններուն եւ կը դատապարտէ Ազրպէյճանի զինեալ ուժերուն կողմէ քաղաքային բնակչութեան վրայ յարձակումները` շեշտելով, որ կը սատարէ կողմերուն միջեւ կառուցողական բանակցութիւններուն` ուղղուած խնդիրի խաղաղ լուծման, որ պէտք է հիմնուած ըլլայ Լեռնային Ղարաբաղի ժողովուրդի մեծամասնութեան կամքի արտայայտութեան վրայ: