Ֆրանսայի նախագահ Էմանուէլ Մաքրոն Հարաւային Եւրոպայի երկիրներու վեհաժողովին ընթացքին իր արտասանած խօսքին մէջ նշեց. «Աշխատանք պիտի տանիմ Թուրքիոյ նկատմամբ եւրոպական միացեալ կեցուածքի որդեգրման համար»` արեւելեան Միջերկրականի ճգնաժամին մէջ իր զօրակցութիւնը յայտնելով Յունաստանին:

«Եւրոպան պէտք է աւելի խիստ ըլլայ Թուրքիոյ նախագահ Ռեճեփ Թայիփ Էրտողանի հանդէպ, եւ եւրոպական պետութիւններուն գերիշխանութիւնը կարմիր գիծ է», նշեց Մաքրոն:

«Կ՛ուզենք արեւելեան Միջերկրականի տագնապին մէջ խուսափիլ որեւէ մագլցումէ, սակայն Թուրքիան պէտք է իր մտադրութիւնները յստակացնէ», ըսաւ Ֆրանսայի նախագահը` շեշտելով. «Մեր աջակցութիւնը յայտնեցինք Եւրոպական Միութեան անդամ պետութիւններուն, երբ թրքական սադրանքներու ենթարկուեցան»:

Թուրքիոյ արտաքին գործոց նախարարութիւնը` հաղորդագրութիւն մը հրապարակելով, յայտարարեց. «Ֆրանսայի նախագահ Էմանուէլ Մաքրոնի անձնական ու ազգայնական կեցուածքները լարուածութիւնը կը քաջալերեն եւ Եւրոպական Միութեան շահերը անդունդը կը նետեն»:

«Մաքրոն սրտի կսկիծով յարձակում կը գործէ Թուրքիոյ վրայ իր չարամիտ բոլոր ծրագիրները ձախողութեան մատնելէն ետք, նաեւ արտաքին քաղաքականութեան մէջ իր խաղերը խանգարելուն համար», նշեց նախարարութիւնը:

«Եւրոպական Միութիւնը Թուրքիոյ Դէմ Արդիւնաւէտ Պատժամիջոցներ
Պէտք Է Հաստատէ» Կ՛ըսէ Յունաստանի Վարչապետը

Յունաստանի վարչապետ Քիրիաքոս Միցոթաքիս նշեց, թէ «Եւրոպական Միութիւնը պէտք է Թուրքիոյ դէմ արդիւնաւէտ պատժամիջոցներ հաստատէ, եթէ ան իր նաւերը չհեռացնէ արեւելեան Միջերկրականի վիճելի շրջաններէն»:

«Իրապէս երկխօսութեան կարիք ունինք, սակայն ոչ սպառնալիքի տակ: Ինչ որ Յունաստանի անվտանգութիւնն ու կայունութիւնը կը վտանգէ, նաեւ Եւրոպական Միութեան բոլոր անդամ պետութիւններուն հանգստութիւնն ու ապահովութիւնը կը վտանգէ», ըսաւ Միցոթաքիս:

Ան նաեւ նշեց. «Եթէ Եւրոպան կ՛ուզէ իսկական աշխարհաքաղաքական իշխանութիւն ունենալ, պէտք չէ Թուրքիոյ յարձակողականութեան առջեւ զիջում կատարէ»:

«Թուրքիան տակաւին ժամանակ ունի պատժամիջոցներէ խուսափելու եւ ետքայլ կատարելու», ըսաւ ան` շեշտելով. «Անոնք պէտք է ետքայլ ընեն, (բանակցութիւններու) սեղան վերադառնան եւ շարունակեն աշխատանքը այն կէտէն, զոր լքեցին, երբ 2016-ին նախապատրաստական բանակցութիւններէն հեռացան, իսկ եթէ չկարողացանք համաձայնիլ, ապա պէտք է ջանանք Լա Հէյի մէջ լուծումի հասնիլ»:

Միւս կողմէ, ամերիկեան «Պլումպըրկ» լրատու գործակալութիւնը` յղում կատարելով լաւատեղեակ աղբիւրի մը, հաղորդեց, որ Կիպրոս, արեւելեան Միջերկրականի մէջ Թուրքիոյ հետ իր հարցին պատճառով արգելք հանդիսացած է, որ Եւրոպական Միութիւնը Պիելոռուսիոյ դէմ պատժամիջոցներ հաստատէ, եւ ատոր փոխարէն ջանացած է իր տնտեսական գօտիին մէջ բնական կազի որոնման աշխատանքին մեղսակից թրքական 7 ընկերութիւններ ներառել Եւրոպական Միութեան պատժամիջոցներու ցանկին վրայ: