Թուրքիոյ արտաքին գործոց նախարարութեան բանբեր Համի Աքսոյ արձագանգած է Աւստրիոյ կողմէ Թուրքիոյ ուղղուած լրտեսութեան վերաբերող մեղադրանքներուն: Այս մասին կը հաղորդէ «Անատոլու» լրատու գործակալութիւնը:

«Մենք կը հերքենք աւստրիական իշխանութիւններուն կողմէ մեր երկրի ուղղուած անհիմն մեղադրանքները: Ակնյայտ է, որ ատոր ետին կանգնած են հակաթրքական շրջանակները», ըսուած է Թուրքիոյ արտաքին գործոց նախարարութեան բանբերին գրաւոր յայտարարութեան մէջ:

Աքսոյ իր հրապարակած հաղորդագրութեան մէջ նշած է, թէ Թուրքիոյ իշխանութիւնները ապշած են նման անլուրջ մեղադրանքներէն:

«Այս իրավիճակը վատ անդրադարձ կ՛ունենայ Աւստրիոյ թրքական համայնքին վրայ եւ վնաս կը հասցնէ թուրք-աւստրիական յարաբերութիւններուն: Աւստրիական կառավարութիւնը պէտք է հրաժարի ներքաղաքական մանր հաշուարկներով Թուրքիոյ միջոցով արհեստական օրակարգ հետապնդելէ, պէտք է գործէ պետական արժանիքներով եւ առողջ մտքով», աւելցուցած է Աքսոյ:

Նշենք, որ Աւստրիոյ մէջ ձերբակալուած է թուրք լրտես մը, որ հետեւած է Աւստրիոյ մէջ Թուրքիոյ նախագահ Ռեճեփ Թայիփ Էրտողանի քննադատներուն: Այս մասին յայտարարեց Աւստրիոյ ներքին գործոց նախարար Քարլ Նեհամեր:

Նախարարը աւելցուց, որ Աւստրիան ձերբակալութեան առնչուած դիւանագիտական քայլերու պիտի նախաձեռնէ, իսկ դատական իշխանութիւնը լրտեսութեան մեղադրանք պիտի ներկայացնէ