17 մարտին Հայաստանի մէջ արձանագրուեցաւ «Քորոնա» ժահրի 14 նոր պարագայ: Այս մասին դիմատետրի իր էջին վրայ գրած է Հայաստանի առողջապահութեան նախարար Արսէն Թորոսեան:

14-էն ոմանք արդէն իսկ մեկուսացուած էին, իսկ միւսներուն շփման շրջանակը կը ճշդուի: Անոնցմէ մէկը կապ ունի Էջմիածինի դէպքին հետ, իսկ 7-ը` «արտադրամասի»:

Միւս կողմէ, արտակարգ իրավիճակներու նախարարութեան մէջ տեղի ունեցած հանդիպումին ընթացքին առողջապահութեան նախարարութեան հիւանդութիւններու վերահսկողութեան եւ կանխարգիլման բաժինի բժիշկ-համաճարակաբան Լուսինէ Պարոնեան յայտնեց, որ «Քորոնա» ժահրով վարակուած անձերուն հետ կապ ունեցող բոլոր անձերը մեկուսացուած են, եւ անոնց կարգին են կարի արտադրամասի 500 անձեր: «Իրենք անընդհատ կապի մէջ են մեզի հետ, մեր աշխատակիցներն ալ օրը մէկ անգամ կը կապուին ու ստուգումներ կը կատարեն իրենց առողջական վիճակին մասին», ըսաւ մասնագէտը: