Վերջերս Թուրքիոյ մէջ տեղի ունեցած տեղական ինքնակառավարման մարմիններու ընտրութիւններուն Շիշլի նահանգային խորհուրդին մէջ Հանրապետական ժողովուրդի կուսակցութենէն ընտրուած անդամ Սելինա Տողան «Թերթ»-ի հետ հարցազրոյցի մը ընթացքին յայտնեց. «Ընտրական կեդրոնական յանձնախումբը անվաւեր ճանչցաւ միայն Պոլսոյ ընտրութիւններու արդիւնքները, սակայն ոչ Պոլսոյ նահանգի ընտրութիւնները»:

Անոր համաձայն, իրենց համար հասկնալի է, թէ ինչո՛ւ Թուրքիոյ իշխող ուժը ուզած է ջնջել ինքնին Պոլսոյ ընտրութիւններուն արդիւնքները: «Անոնք Պոլսոյ քաղաքապետարանին մէջ իրենց իշխանութիւնը ստեղծած էին: Գիտենք, որ Էրտողան նախապէս Պոլսոյ քաղաքապետ եղած է: Անոնք իրենց աջակիցները սկսած են «կերակրել» ինքնին Պոլսոյ քաղաքապետարանէն: Անիկա շատ մեծ քաղաք է` անոնց համար շատ մեծ ելեւմտական ներուժով: Անոնք այնտեղ կը կերակրէին իրենց կրօնական եւ այլ հիմնադրամները», ըսաւ ան` նշելով, որ այդ իսկ պատճառով իշխող կուսակցութիւնը չ՛ուզեր կորսնցնել Պոլսոյ մէջ իր իշխանութիւնը, «եթէ անոնք Պոլիսը կորսնցնեն, աստիճանաբար պիտի կորսնցնեն Թուրքիան»:

Ըստ Սելինա Տողանի, Թուրքիոյ նախագահ Ռեճեփ Թայիփ Էրտողան հիմա կ՛օգտագործէ իր վերջին կարելիութիւնը, ան չի կրնար սպասել, քանի տակաւին Թուրքիոյ տնտեսական վիճակը առաւել չէ վատթարացած:

Տողանի կարծիքով` իրենք ստեղծուած իրավիճակին պէտք է արձագանգեն իրենց բողոքը արտայայտելով օրինական միջոցներով: «Մենք պէտք է բողոքենք», ըսաւ ան` նկատելով, որ Պոլսոյ մէջ արդէն բողոքի որոշ դրսեւորումներ եղած են. անոնք ինքնաբուխ էին եւ կ՛արտայայտէին հասարակութեան դժգոհ տրամադրութիւնը:

Ան նշեց, որ նոյնիսկ իշխող Արդարութիւն եւ բարգաւաճում կուսակցութեան քուէարկածները կ՛ըսեն, թէ Ընտրական կեդրոնական յանձնախումբի որոշումը արդար չէ իրենց նկատմամբ:

Անդրադառնալով Պոլսոյ ընտրութիւններուն շուրջ տեղի ունեցածին վերաբերեալ միջազգային արձագանգին` Սելինա Տողան նշեց, որ միջազգային ընտանիքը արտայայտած է իր մտահոգութիւնները Թուրքիոյ ընտրութիւններուն եւ ժողովրդավարութեան պակասին վերաբերեալ: «Անոնք մտահոգ են, որ Թուրքիոյ մէջ հաւանաբար այլեւս ընտրութիւններ չըլլան: Ատիկա նաեւ մեր մտահոգութիւնն է: Ատիկա մեր միակ ժողովրդավարական գործիքն է, պէտք է աշխատինք զայն պահպանելու: Մենք հիմա նոյնիսկ կը սպասենք վատագոյն բեմագրութեան` որոշ պատճառներով արտակարգ իրավիճակ յայտարարելու կարելիութեան եւ ընտրութիւններ չկատարելուն», ըսաւ ան:

Անոր համաձայն, Էրտողանէն ամէն ինչ սպասելի է: «Ան ամէն բան պիտի ընէ` չպարտուելու համար, որովհետեւ ասիկա անոր վերջին կարելիութիւնն է», ըսաւ Սելինա Տողան: