Արեւմտահայերէն Ուիքիփետիան` որպէս առանձին ուիքիհարթակ, արդէն բացուած է։

Հանրագիտարանը դեռ նոր է, համարեա դատարկ, եւ շուտով Արեւելահայերէն Ուիքիփետիայէն արեւմտահայերէն յօդուածները պիտի տեղափոխուին Արեւմտահայերէն Ուիքիփետիա, եւ հանրագիտարանը բնականոն հունով արդէն պիտի շարունակէ զարգանալ․ կը գրէ “Վիքիմեդիա Հայաստան”-ի ֆէյսպուքի էջը։

Արեւմտահայերէն Ուիքիփետիայի առաջին յօդուածը յատկանշական է․ ան կը պատմէ Մայրենի լեզուի օրուան մասին`https://hyw.wikipedia.org/wiki/Մայրենի_Լեզուի_Օր

Արեւմտահայերէն Ուիքիփետիայի` որպէս առանձին հանրագիտարան դառնալու ջանքերուն նպաստած են «Վիքիմեդիա Հայաստան» գիտակրթական հասարակական կազմակերպութիւնը եւ «Գալուստ Կիւլպէնկեան» հիմնարկութիւնը, որոնք անցնող տարիներուն աջակցած են Արեւմտահայերէն Ուիքիփետիայի ստեղծման եւ հովանաւորած նախագիծի միջոցառումները:

Արեւմտահայերէն Ուիքիփետիան բաց է բոլորիս համար: Ուիքիփետիայի խմբագրման հնարաւորութիւններուն ծանօթ բոլոր անձիք կրնան իրենց մասնակցութիւնը բերել հանրագիտարանի զարգացման գործին: