Երեքշաբթի, 17 Ապրիլ 2018-ի առաւօտուն, Ն.Ս.Օ.Տ.Տ. Արամ Ա. Վեհափառ Հայրապետին ացելեցին Մխիթարեան Միաբանութեան անդամներէն Գերյարգելի Հ. Յովսէփ Ծ. Վրդ. Թոփալեան եւ իրեն ընկերացող Հ. Մեսրոպ Վրդ. Թոփալեան։ Անոնք Վեհափառ Հայրապետին մտահոգութեամբ պարզեցին Մխիթարեան Միաբանութեան դիմագրաւած դժուարութիւններն ու մարտահրաւէրները։ Ապա, Նորին Սրբութեան ուշադրութեան յանձնեցին Լիբանանի հայութեան կեանքէն ներս երկար տարիներէ՝ 1937էն ի վեր, կրթական ու մշակութային առաքելութեան լծուած, Հազմիէյի մէջ հաստատուած Մխիթարեան վարժարանին առնչուած դժուարութիւնները, յատկապէս վարժարանը վաճառելու գծով գոյութիւն ունեցող ծրագիրները։

Հայրապետը իր կարգին ընդհանուր անդրադարձ մը կատարելով՝ շեշտեց Մխիթարեան Միաբանութեան կատարած կրթական ու մշակութային կարեւոր դերը մեր ժողովուրդին կեանքէն ներս։ Ան յոյս յայտնեց, որ հակառակ տիրող դժուարութիւններուն Մխիթարեան Միաբանութիւնը վերանորոգ ոգիով շարունակէ իր կրթական ու մշակութային առաքելութիւնը։ Ան կարեւորութեամբ շեշտեց, որ հայ դպրոց մը փակելը հարուած մըն է ուղղուած հայու ինքնութեան ու գոյութեան առողջ պահպանման, յատկապէս Լիբանանի մէջ եւ խոստացաւ, որ այս գծով անհրաժեշտ կապեր պիտի հաստատէ Վատիկանի եւ Մխիթարեան Միաբանութեան վերին պատասխանատուներուն հետ։