Թուրքիոյ մէջ զինուորական ծառայութեան ժամանակ ծառայակիցին կողմէ սպաննուած Սեւակ Շահին Պալըքչըի գործը սպանութենէն 6 տարի անց նորէն պիտի քննուի, սակայն արդէն քաղաքացիական դատարանին մէջ:

Ինչպէս կը տեղեկացնէ «Ակօս»–ը, Սեւակ Շհին Պալըքչըի գործով դատական առաջին նիստը քաղաքացիական դատարանին մէջ պիտի քննուի 2018–ի Փետրուար 8–ին:

Նշենք, որ 2011-ի Ապրիլ 24-ի առաւօտեան Սեւակը սպաննուած է մէկ այլ զինծառայող` Քւանչ Աղաօղլուի կողմէ: Սպանութեան հետ կապուած ոստիկանութիւնը յայտարարած է, որ անիկա տեղի ունեցած է ծառայակից ընկերոջ հետ կատակ ընելու ժամանակ, իբր, պատահաբար արձակուած կրակոցէ մը: Սեւակին ծնողները կը պնդեն, որ իրենց որդին սպաննած են ազգայնականութեան հողի վրայ` հայ ըլլալուն համար:

Սեւակ Շահին Պալըքչըի սպանութեան գործով դատարանը 4,5 տարուան ազատազրկման դատապարտած է Սեւակին զինծառայակից Քւանչ Աղաօղլուն` անփութութեան հետեւանքով մարդ սպաննելուն համար:

Սակայն զինուորական վճռաբեկ դատարանը բեկանած էր վճիռը ու որոշած գործը զերոյէն վերանայիլ: Բայց 2016–ի Յուլիս 15–ի յեղաշրջման փորձէն ետք յատուկ որոշումով Թուրքիոյ մէջ վերացուած են ռազմական դատարանները: Այս որոշումէն ետք յայտնի դարձած է, որ Տիարպեքիրի ռազմական դատարանին մէջ ընթացող Սեւակ Շահին Պալըքչըի սպանութեան գործը պիտի տեղափոխուի Քոզլուքի քաղաքացիական դատարան: