22 օգոստոս 2017-ին, նախագահութեամբ Տանն Կիլիկիոյ կաթողիկէ հայոց ամենապատիւ եւ գերերջանիկ Տ. Տ. Գրիգոր Պետրոս Ի. կաթողիկոս պատրիարքին, Հայ կաթողիկէ եկեղեցւոյ Եպիսկոպոսաց սիւնհոդոսը գումարուեցաւ Զմմառու վանքին մէջ: Եպիսկոպոսաց սիւնհոդոսին իրենց մասնակցութիւնը բերին Հայ կաթողիկէ թեմերու առաջնորդները, ինչպէս նաեւ միաբանութեանց մեծաւորները: Սիւնհոդոսը պիտի տեւէ մինչեւ ուրբաթ, 1 սեպտեմբեր 2017:

Հայ կաթողիկէ եկեղեցւոյ հայրերը այս սիւնհոդոսին ընթացքին պիտի քննարկեն հոգեւոր, հովուական, թեմական, կանոնական, վարչական, կրթական, հրատարակչական, տեղեկատուական եւ ընկերային հարցեր, ինչպէս նաեւ Միջին Արեւելքի համայն քրիստոնէութեան իրավիճակը, յատկապէս` Սուրիոյ եւ Իրաքի քրիստոնեայ բնակչութեանց տագնապալի կացութիւնը:

Սիւնհոդոսական հայրերը յատուկ կերպով պիտի անդրադառնան շրջանի հայկական գաղութներուն իրավիճակին եւ համայն հայութիւնը յուզող հարցերուն ու մարտահրաւէրներուն:

ԴԻՒԱՆ ՀԱՅ ԿԱԹՈՂԻԿԷ ՊԱՏՐԻԱՐՔԱՐԱՆԻ