Մայիսի 25-ին Հռոմի Վալիչելիանա գրադարանում կայացաւ տեղեկատուութեան ազատութեան համար շնորհուող «Հրանտ Տինք» լրագրողական 10-րդ մրցանակաբաշխութիւնը:

Միջոցառումը կազմակերպուել էր Հռոմի հայ համայնքի խորհրդի կողմից՝ «Լրագրողներ առանց սահմանների» կազմակերպութեան հետ համագործակցաբար և Իտալիայում Հայաստանի դեսպանութեան հովանու ներքոյ: Այս տարի մրցանակի արժանացաւ իտալուհի լրագրող Մարթա Օթթավիանին, ով համարւում է Իտալիայում Թուրքիայի լաւագոյնն փորձագէտներից մէկը:
Այս տարի լրանում է Թուրքիայում բնակուող հայ լրագրող Հրանտ Տինքի սպանութեան տասներորդ տարին: Այդ սպանութեան իրագործողները մինչ օրս բացայայտուած չեն:

Միջոցառմանը ելոյթի խօսքով հանդէս եկան Իտալիայում ՀՀ դեսպան Վիկտորիա Բաղդասարեանը, Վալիչելիանա գրադարանի տնօրէն Պաոլա Պաեզանոն, Հռոմի հայ համայնքի խորհրդի անդամներ Ռոբերտ Աթթարեանը և Նուարթ Գրիգորեանը:

«Ռատիօ Վատիկանի»-ի լրագրող Մոնիա Պարենտեն ներկաներին ընթերցեց Հրանտ Տինքի վերջին յօդուածը, մինչդեռ փաստաբան Ֆուլվիո Սարզանան նշեց ժամանակակից աշխարհում լրագրողական մասնագիտութեան առաւել կարևոր կողմերը: 2007թ. «Հրանտ Տինք» լրագրողական մրցանակի առաջին մրցանակակիր Մարքօ Թոզաթթին խօսեց այն մարտահրաւէրների մասին, որոնց ամեն օր հանդիպում են լրագրողները և այն եռանդի մասին, որն անհրաժեշտ է լրագրողական դժուար և շատ անգամ անշնորհակալ աշխատանքն իրականացնելու համար: Էմանուելէ Ալիպրանդին իր հերթին նշեց այն դրդապատճառները, որոնք հանգեցրել են մրցանակը Մարտա Օտտավիանիին յանձնելուն:

Երեկոյի աւարտին Իտալիայում ՀՀ դեսպան Վիկտորիա Բաղդասարյանը մրցանակը յանձնեց Մարտա Օտտավիանիին, որն էլ իր հերթին, նկատելի յուզմունքով, ևս մէկ անգամ խօսեց Հրանտ Տինքի՝ որպէս անձնաւորութեան և որպէս լրագրողի ուժեղ կամային յատկութիւնների մասին, ինչպէս նաև յիշատակեց վերջինիս սէրը դէպի Թուրքիա, որն այսօր ապրում է դժուար ժամանակներ: