Թուրքիոյ ոստիկանութեան մասնայատուկ ուժերը Մայիս 7-ի երեկոյեան ներխուժած են հանրածանօթ «Պելկէ» հրատարակչութեան գրասենեակը եւ գրաւած աւելի քան երկու հազար գիրք:

Ըստ Armradio.am-ի՝ հրատարակչատան հիմնադիր եւ տնօրէն, թուրք պատմաբան, եւ Թուրքիոյ մէջ մարդու իրաւունքներու պաշտպան Ռակըփ Զարաքոլու հաստատած է այս տեղեկութիւնը, յայտնելով թէ, գիրքերուն գրաւման մասին դատական որոշում գոյութիւն չէ ունեցած, եւ ոստիկաններու գործողութիւնը անօրինական է:

«Պելկէ» հրատարակչատունը Թուրքիոյ մէջ առաջիններէն էր, որ 1990-ական թուականներու սկիզբը անդրադարձած է Հայոց ցեղասպանութեան: «Պելկէ» հրատարակչատան կը պատկանին «Յուշամատեան Ապրիլ 24-ի», «Հայոց ցեղասպանութիւն» եւ հայկական հարցին նուիրուած տասնեակ մը այլ գիրքեր:

«Պելկէ» հրատարակչատունը պարբերաբար ենթարկուած է յարձակումներու եւ մերթ ընդ մերթ ստիպուած եղած է դադրեցնել աշխատանքը:

Զարաքոլուի այս հրատարակչատունը, շուրջ քառասուն տարի չհրաժարելով իր ընդդիմադիր հայեացքներէն, գործած է Թուրքիոյ մէջ եւ զբաղած բազմաթիւ օտարալեզու պատմագիտական գիրքերու թրքերէն թարգմանութեամբ, ինչպէս նաեւ հրատարակելով թրքերէն հեղինակային գիրքեր, որոնք լոյս սփռած են Թուրքիոյ այլընտրանքային, պաշտօնական պատմագրութենէն դուրս մնացած անցեալի վրայ: