Թուրքիոյ նախագահ Ռեճեփ Թայիփ Էրտողան սահմանադրական փոփոխութիւններուն վերաբերող հանրաքուէէն առաջ ծայր առած նախընտրական քարոզչութեան ընթացքին խօսած է Թուրքիոյ թշնամիներուն մասին:

Թրքական «Տիքեն» կայքը կը գրէ, որ Էրտողան թուրքերուն կոչ ուղղած է` անպայման «այո՛» քուէարկելու կառավարման նախագահական համակարգին եւ նշած, թէ Թուրքիոյ մէջ նախագահին լիազօրութիւններու ընդլայնման դէմ են միայն երկրին թշնամիները:

«Անոնք, որոնք 100 տարի առաջ նետեցինք ծովը, ճիշդ անոնք հիմա «ո՛չ» կ՛ըսեն սահմանադրական փոփոխութիւններուն: Կ՛ուզեն իրենց ձիերով վրայերթի ենթարկել «այո՛» ըսողները», Պոլսոյ մէջ կայացած հանրահաւաքի ընթացքին ըսած է Էրտողան:

Անոր խօսքը 1922-1923 թուականներուն Թուրքիոյ մէջ տեղի ունեցած քեմալական-ազգայնական շարժումին մասին է, որուն ընթացքին ալ, ըստ թրքական պաշտօնական պատմագրութեան, թուրքերը «Պոսֆորի ջուրերը նետած են կեաւուրները` քրիստոնեայ բռնագրաւիչները»:

Շարժումը Թուրքիոյ պաշտօնական պատմագրութեան մէջ կը նշուի իբրեւ կայսերապաշտութենէն եւ օտար բռնագրաւումէն փրկութեան պայքար ու կը յիշատակուի «Փրկութեան պատերազմ» եզրով:

1922-23-ի ազգայնական այդ շարժումին ընթացքին Թուրքիոյ մէջ գործուած է պոնտոսցի յոյներու ցեղասպանութիւնը, ինչպէս նաեւ կոտորուած են Ցեղասպանութենէն ետք Արեւմտեան Հայաստան վերադարձած տասնեակ հազարաւոր հայեր:

Միւս կողմէ` Էրտողան նաեւ յայտարարած է, որ եւրոպացիները կը հալածեն Եւրոպա ապրող թուրքերը, իսկ ասոր պատասխանը շատ շուտով պիտի տայ Թուրքիան:

«Այդ բոլորին գինը անոնք պիտի վճարեն սահմանադրական փոփոխութիւններուն վերաբերեալ հանրաքուէէն ետք», յայտարարած է ան:

Թուրքիոյ նախագահը պնդած է, որ Եւրոպան «հիւանդ» է, եւ իրականութեան մէջ ինքնին անոնց տնտեսութիւնն է, որ կը կործանի, եւ ոչ թէ Թուրքիոյ:

«Իրականութեան մէջ հիւանդը ինքնին անոնք են: Եւրոպայի տնտեսական վիճակը կը վատթարանայ: Նացիական ժահրը տարածուած է անոնց մէջ: Այս անգամ անոնց գործը շատ բարդ պիտի ըլլայ», ըսած է Էրտողան: