Ռուսիան ու Թուրքիան պիտի շարունակեն ահաբեկչութեան դէմ պայքարի ծիրին մէջ իրենց համագործակցութիւնը Սուրիոյ մէջ, եւ այդ համագործակցութիւնը պիտի շարունակուի մինչեւ ահաբեկիչներու ամբողջական ջախջախումը: Այս մասին «ՌԻԱ Նովոսթի»-ի հետ զրոյցի ընթացքին յայտարարած է Ռուսիոյ դաշնակցային խորհուրդի միջազգային հարցերու յանձնախումբի նախագահ Քոնսթանթին Քոսաչեւ:

Մեկնաբանելով Սուրիոյ հիւսիսը թրքական բանակին շղթայազերծած «Եփրատի վահան» գործողութեան աւարտի մասին լուրը` Քոսաչեւ նշած է, որ ատիկա դրական զարգացում է, որովհետեւ «Եփրատի վահան»-ը առանց Սուրիոյ իշխանութիւններուն համաձայնութիւնը ստանալու կատարուած զինուորական գործողութիւն էր:

«Լաւ է, որ աւարտեցաւ», ըսած է ան: Ըստ անոր, փոխադարձ գործակցութիւնը կազմակերպուած է «ասթանայեան եռեակ» ձեւաչափին մէջ եւ ունի սուրիական իշխանութիւններուն հետ համաձայնեցուած շրջագիծեր, խնդիրներ եւ նպատակներ:

Թուրքիոյ վարչապետ Պինալի Եըլտըրըմ չորեքշաբթի օր պաշտօնապէս հաստատեց «Եփրատի վահան» գործողութեան աւարտը: Ան չբացառեց, որ ապագային Թուրքիան կրնայ վերսկսիլ Սուրիոյ տարածքին զինուորական գործողութիւնները, եթէ այնտեղ գտնուող տարբեր խմբաւորումներու գործողութիւններն ու զարգացող իրադարձութիւնները վտանգ կը ներկայացնեն Թուրքիոյ անվտանգութեան: