Մայատին արբանեակային պատկերասփիւռի կայանը կը հաղորդէ, որ Դամասկոս յայտարարած է, որ Սուրիոյ հակաօդային պաշտպանութեան համակարգերը վար առած են Քընէյթրա քաղաքին վերեւ թռիչք կատարող իսրայէլեան անօդաչու թռչող սարք մը:

Դամասկոս կը հաղորդէ, որ սարքը վար առնուած է Սուրիոյ օդային տարածքը խախտելէ ետք:

Իսրայէլեան բանակը հաստատեց Սուրիոյ մէջ մարտավարական հետախուզական անօդաչու թռչող սարքի կորուստը: «Մարտավարական անօդաչու թռչող սարքը կորսուած է, պատահարին հանգամանքները կը սերտուին», կը նշէ իսրայէլեան բանակի մամլոյ ծառայութիւնը:

Իսրայէլեան «Ճերուզալեմ փոսթ» օրաթերթը իր կարգին` վկայակոչելով Թել Աւիւէն աղբիւրներ, կը պնդէ, որ սարքը իրապէս ինկած է, սակայն վար չէ առնուած:

Իսրայէլեան Բանակը Կը Խոստովանի Սուրիոյ Մէջ Օդանաւ Մը Կորսնցնելը

«Էսոշիէյթըտ Փրես» հաղորդեց, որ իսրայէլեան բանակը հաստատած է, որ այս շաբթուան սկիզբը Սուրիոյ մէջ օդանաւ մը կորսնցուցած է:

Իսրայէլեան բանակը հաղորդագրութիւն մը հրապարակելով յայտնած է, որ «Սքայ Լարք» տիպի անօդաչու թռչող սարքը ջախջախուած է կիրակի օր եւ դէպքին շուրջ տեղի կ՛ունենայ հետաքննութիւն` աւելցնելով, որ «տեղեկութիւններու սպրդումի վտանգ գոյութիւն չունի»:

Նշենք, որ սուրիական բանակը յայտարարած էր, որ շաբաթ առաւօտեան ժամը 2:00-ին Սուրիոյ մէջ թիրախներ հարուածող իսրայէլեան չորս օդանաւերէն մէկը վար առած է, իսկ մէկ ուրիշը` ծանր վնասի ենթարկած: Օրին Իսրայէլեան բանակը հերքած էր օդանաւ մը կորսնցուցած ըլլալը:

�