Նախագահ Սերժ Սարգսեան երէկ ընդունած է Ռուսիոյ անվտանգութեան խորհուրդի քարտուղար Նիքոլայ Փաթրուշեւը:

Զրուցակիցները երկուստեք գոհունակութեամբ արձանագրած են, որ հայ եւ ռուս ժողովուրդներու ամուր բարեկամութեան վրայ հիմնուած միջպետական ռազմավարական դաշնակցային յարաբերութիւնները ուժականօրէն կը զարգանան, տարուէ տարի կ՛ընդլայնի համագործակցութեան օրակարգը, որուն զգալիօրէն կը նպաստեն բարձր մակարդակի փոխադարձ այցելութիւնները: Ինչպէս երկկողմանի, նոյնպէս ալ բազմակողմանի ձեւաչափերով հայ-ռուսական յարաբերութիւններուն մէջ Հայաստանի Հանրապետութեան նախագահը եւ Ռուսիոյ անվտանգութեան խորհուրդի քարտուղարը կարեւոր նկատած են համագործակցութիւնը անվտանգութեան մարզին մէջ:

Նախագահ Սարգսեան բարձր գնահատած է Հայաստանի ազգային անվտանգութեան խորհուրդի քարտուղարութեան եւ Ռուսիոյ անվտանգութեան խորհուրդի աշխատակազմին միջեւ հաստատուած յարաբերութիւններու մակարդակը եւ յոյս յայտնած, որ Նիքոլայ Փաթրուշեւին այցելութիւնը նոր խթան կը հաղորդէ երկու կառոյցներուն եւ ընդհանրապէս անվտանգութեան մարզին մէջ միջպետական յարաբերութիւններու ամրապնդման ու խորացման:

Հանդիպումին անդրադարձ կատարուած է նաեւ արագ փոփոխուող աշխարհին մէջ միջազգային արդի խնդիրներուն եւ մարտահրաւէրներուն, շրջանային զարգացումներուն, Արցախի տագնապի խաղաղ լուծման հոլովոյթի ներկայ վիճակին, ինչպէս նաեւ փոխադարձ հետաքրքրութիւն ներկայացնող այլ հարցերու:

�