«Արմէնփրես» կը հաղորդէ, որ գերմանական «Տէօչէ Վելլէ» լրատու գործակալութիւնը կը հաղորդէ, որ Եւրոպական խորհուրդի սահմանադրական օրէնքի փորձագէտները` Վենետիկի յանձնախումբը պատրաստած է Թուրքիոյ մէջ նախատեսուած սահմանադրական փոփոխութիւններու վերաբերեալ զեկուցում մը, որուն մէջ իր մտահոգութիւնը կը յայտնէ բռնատիրական վարչակարգի հաստատման կապակցութեամբ:

Գերմանական «Սիւտէօչէ Ցայթունկ» օրաթերթին մէջ հրապարակուած Վենետիկեան յանձնախումբի զեկուցումին մէջ կը նշուի, որ Թուրքիոյ մէջ «ժողովրդավարական համակարգը ողբերգական կերպով յետընթաց արձանագրած է, իսկ մենատիրական, մէկ մարդու վարչակարգը կը շարունակուի»: Բացի ատկէ, յանձնախումբին անդամները յայտնած են, որ Թուրքիոյ մէջ կը բացակային բոլոր մեքանիզմները, որոնք անհրաժեշտ են մենատիրական վարչակարգը կանխարգիլելու համար:

Վենետիկեան յանձնախումբը արձանագրած է, որ Թուրքիոյ մէջ նախատեսուող սահմանադրական փոփոխութիւններով դատական համակարգը, որ առանց այդ ալ կորսնցուցած է իր ուժը, նախագահական համակարգի հաստատուելէն ետք ամբողջութեամբ պիտի կորսնցնէ իր անկախութիւնը: Յանձնախումբը քննադատած է նաեւ այն, որ Թուրքիոյ մէջ փոփոխութիւնները պիտի կատարուին ձախողած յեղաշրջման փորձէն ետք յայտարարուած արտակարգ դրութեան պայմաններուն մէջ:

Յանձնախումբը Անգարային կոչ ուղղած է յետաձգելու սահմանադրական հանրաքուէն, այնքան ատեն որ երկրին մէջ արտակարգ դրութիւն յայտարարուած է:

Թուրքիոյ մէջ սահմանադրական բարեփոխումներու շուրջ հանրաքուէն նախատեսուած է 16 ապրիլին

�