«Հապերթիւրք» օրաթերթը կը հաղորդէ, որ Թուրքիոյ վարչապետ Պինալի Եըլտըրըմ Չանքայա պալատին մէջ պատկերասփիւռի կայաններու ղեկավարներուն հետ իր հանդիպումին ընթացքին յայտարարած է, որ Թուրքիոյ զինեալ ուժերու սպայական անձնակազմին 60-80 առ հարիւրը, զինուորական ուսումնարաններուն 95 առ հարիւրը կապ ունին «Կիւլենի ահաբեկչական կազմակերպութեան»` ՖԵԹԷՕ-ի հետ, որ Անգարայի կողմէ կը մեղադրուի երկրին մէջ զինուորական յեղաշրջումի փորձ կազմակերպելու մէջ:

Թուրքիոյ վարչապետը ըսած է, որ զինուորական յեղաշրջումի փորձի դասերէն մեկնելով` կառավարութիւնը կը պատրաստուի վերակառուցելու զինեալ ուժերը եւ բարեփոխումներ կատարելու: Ան ըսած է, որ Թուրքիոյ Զինուորական բարձրագոյն խորհուրդին կառուցուածքը պէտք է փոխուի:

Ըստ անոր, Կիւլենի կազմակերպութիւնը Թուրքիոյ մէջ կրնայ կազմուած ըլլալ շուրջ 50 հազար մարդոցմէ, որոնք իրարու հետ հաղորդակցելու սեփական ցանցեր ունին:

Եըլտըրըմ ըսած է, որ ներկայիս բացայայտուած է Կիւլենի կազմակերպութեան առնչուած 76.597 մարդ, պետական համակարգին մէջ աշխատանքէ հեռացուած են 7897 անձեր, որոնք կը կարծուին կազմակերպութեան հետ կապեր ունենալ, եւ անոնցմէ 3000-էն աւելին զինուորականներ են:

«Ընդհանուր առմամբ, մինչեւ հիմա կիւլենականներու հետ կապերու կասկածանքով յայտնաբերուած է 81.494 մարդ», ըսած է Թուրքիոյ վարչապետը:

Եըլտըրըմ ներկաներուն հաւաստած է, որ յառաջիկայ վեց ամիսներուն ընթացքին Սուրիոյ հարցին մէջ Թուրքիոյ կողմէ նոր զարգացումներ պիտի ըլլան:

Միւս կողմէ, Թուրքիոյ վարչապետարանը հերքեց Եըլտըրըմի վերագրուած յայտարարութիւն մը, որ կ՛ակնարկէր Թուրքիոյ մէջ յեղաշրջումի ձախող փորձին մէջ Սէուտական Արաբիոյ մեղսակցութեան:

«Այդ լուրերը եւ մեկնաբանութիւնները ճիշդ չեն եւ բացարձակապէս չեն համապատասխաներ իրականութեան», ըսուած է վարչապետարանի հաղորդագրութեան մէջ:

Թուրքիոյ վարչապետարանը իր գնահատանքն ու ողջունումը արտայայտեց վերջին յեղաշրջումի փորձին հարցով Թուրքիոյ կառավարութեան զօրակցող սէուտական կեցուածքին նկատմամբ:

�