Թուրքիոյ Եւրոպական Միութեան հարցերու նախարար Վոլքան Պոզքըր նշեց, որ իր երկրին կողմէ Եւրոպական Միութեան գաղթականներու վերընդունման վերաբերեալ ներկայացուած առաջարկը չի ներառեր ներկայիս յունական կղզիներուն վրայ գտնուող գաղթականները:

«Համաձայնութեան գործադրութեան սկսելու թուականը պիտի ճշդուի ներկայիս յունական կղզիներուն վրայ գտնուող գաղթականներուն մեկնումէն ետք», ըսաւ Պոզքըր` նշելով. «Թուրքիա վերադարձուելիք գաղթականներուն թիւը, եթէ համաձայնութիւնը ընդունուի, միլիոնաւոր կամ նոյնիսկ հարիւր հազարաւոր պիտի չըլլայ, այլ` հազարաւոր եւ կրնայ հասնիլ 10 հազարի»:

Ան յայտնեց, որ Եւրոպական Միութիւնը Թուրքիոյ ընդունելիք գաղթականներու ընտրութիւնը պիտի կատարէ գաղթականներու հարցերու բարձրագոյն յանձնակատարութեան ծիրին մէջ եւ ընտրութիւնը երկիրներու պիտի չձգուի, «որպէսզի ընտրութիւնը չկատարուի «պիտի ընտրեմ 10 ճարտարապետ եւ 7 բժիշկ, որովհետեւ այդ արհեստները ինծի օգտակար են» հիման վրայ»:

Ինչ կը վերաբերի Եւրոպական Միութեան կողմէ Թուրքիոյ մէջ սուրիացիներուն յատկացուած 3 միլիառ եւրոյի գումարը ծախսելու ձեւին, Պոզքըր այն կարծիքը յայտնեց, որ ատիկա հարց մը պիտի չըլլայ: Ան նշեց, որ ներկայիս շարք մը ձեւեր կը քննարկուին` գումարը ամբողջութեամբ ուղարկել Թուրքիա եւ գումարը ծախսել Եւրոպական Միութեան մնայուն ներկայացուցչութեան հսկողութեան տակ կամ ալ գումարը ուղարկել եւ օգտագործել Միջազգային դրամատան միջոցով:

�