7 մարտին Լեռնային Ղարաբաղի պաշտպանութեան նախարար, պաշտպանութեան բանակի հրամանատար Լեւոն Մնացականեանի նախագահութեամբ Ստեփանակերտի մէջ տեղի ունեցած է ռազմական խորհուրդի նիստ` նուիրուած մարտական հերթապահութեան կազմակերպման եւ գործադրութեան, դիտարկման համակարգի, երկրաչափական արգելափակոցներու եւ ամրաշինական կառոյցներու վիճակին ու անոնց կատարելագործման ուղիներուն:

Պաշտպանութեան բանակի հրամանատարը` կարեւոր նկատելով օրակարգի հարցերը, նաեւ անդրադարձ կատարած է շրջանային եւ աշխարհաքաղաքական իրադրութեան, նախանշած այդ մարզի հետագայ զարգացման հիմնական ուղղութիւնները:

Օրակարգային նիւթին շուրջ ելոյթներով ու զեկուցումներով հանդէս եկած են բանակի հրամանատարի տեղակալները, միաւորումներու եւ զօրամասերու հրամանատարները, ղեկավարման մարմինի համապատասխան բաժիններու ու ծառայութիւններու պետերը:

Խորհրդակցութեան աւարտին զօր. Մնացականեան յանձնարարած է կատարուած առաջարկներն ու անոնց լոյսին տակ առնուելիք քայլերը ընդունիլ ի գիտութիւն եւ անոնցմով առաջնորդուիլ մարտական հերթապահութեան կազմակերպման եւ գործադրութեան ընթացքին:

�