Թունուզի ապահովական ուժերն ու բանակը յաջողեցան ահաբեկիչներու հետ բախումներէ ետք խաղաղութիւնը վերահաստատել երկրին հարաւը գտնուող Պըն Քարտան քաղաքին մէջ:

Թունուզի ներքին գործոց նախարարութիւնը յայտարարեց, որ բախումներուն ընթացքին արձանագրուած են 17 զոհեր, որոնց շարքին` զինուորներ եւ երկու քաղաքացիներ, որոնցմէ մէկը` եռամեայ երեխայ մը: Թունուզեան զինեալ ուժերը յաջողած են սպաննել 28 ահաբեկիչներ եւ ձերբակալել 6 ուրիշներ: Ահաբեկիչները փորձած են յարձակում գործել ապահովական եւ զինուորական կեդրոններու դէմ, սակայն թունուզեան ուժերը ձախողութեան մատնած են այդ փորձը եւ ձեռնարկած խոյս տուող զինեալներու հետապնդման:

Թունուզի նախագահ Պաժի Քայետ Սապսի յայտարարեց. «Լիպիոյ հետ սահմանի փակման ժամը հասած է»: Ան ցաւ յայտնեց, որ Պըն Քարտանի մէջ արձանագրուած ահաբեկչական վերջին յարձակումներէն ետք, այդ միջոցառման որդեգրումը անհրաժեշտ դարձած է:

�