Արեւմտեան եւ Արաբական Ծոցի կարգ մը պետութիւններու սեւ գումարներով հովանաւորուող քարոզչական աղբիւրները, Հալէպի շուրջ ծաւալող բախումներուն մասին թիւր տպաւորութիւն մը կը փորձեն ստեղծել: Ուրեմն, սուրիական բանակը վճռած է յարձակիլ Հալէպի վրայ…: Ոմանք կը մոռնան, որ Հալէպը իբրեւ՝ տարածաշրջան, քաղաքական եւ վարչական կեդրոն, իր դիմագրաւած բոլոր դժուարութիւններով հանդերձ, մեծամասնութեամբ՝ հաւատարիմ կը մնայ Սուրիոյ օրինական իշխանութիւններուն: Նոյնպէս ալ՝ բնակչութիւնը: Ի զուր ապստամբ քաղաքի պատմուճան կ’աշխատին հագցնել Հալէպին:Այնպէս ներկայացնել ՝ Հալէպի ժողովուրդը ապստամբութեան դրօշ բարձրացուցած է իշխանութիւններուն դէմ եւ կամ՝ բանակը կուրօրէն կը ռմբակոծէ քաղաքի խաղաղ բնակիչները:

Հալէպ եղած է Սուրիոյ տնտեսական մայրաքաղաքը: 2012-ին, Սէուտական Արաբիոյ, Քաթարի եւ Թուրքիոյ հովանաւորութեամբ գործող ահաբեկչական կազմակերպութիւնները փորձեցին իրենց հակակշիռին տակ վերցնել Սուրիոյ գլխաւոր քաղաքներ՝ Դամասկոսը եւ Հալէպը: Դամասկոսի վրայ յարձակումը ետ մղուեցաւ: Հալէպի պարագային, ահաբեկիչները յաջողեցան յափշտակել որոշ շրջաններ: Քանդեցին ու կողոպտեցին անոր գործարանները, արդիւնաբերական կեդրոնները,արհեստանոցները,առեւտրական շուկաները, մզկիթները, եկեղեցիները, կրթական հաստատութիւնները, մշակոյթը, պատմութիւնը…: Հալէպցիները մնացին անդրդուելի: Անոնք մերժեցին իրենց հայրենիքին, իշխանութիւններուն դէմ արտաքին միջամտութիւնները, առաւել եւս՝ ծայրայեղական թեքումներով զինեալ կազմակերպութիւններու ներկայութիւնը: Եկաւ ժամանակ, երբ «ժողովրդավարութեան» անունով, աւելի քան ութսուն երկիրներէ խուժած վարձկաններ յաջողեցան պաշարել, կղզիացնել օրինական իշխանութիւններուն հաւատարիմ Հալէպի շրջանները: Դժուարին այդ օրերուն,կառավարութիւնը հազիւ օդային ճանապարհներով եւ սահմանափակ քանակութեամբ օժանդակութիւն կրցաւ առաքել Հալէպի բնակչութեան: Հալէպի բնակչութիւնը սակարկութեան չդրաւ իր հաւատարմութիւնը:

Այսօր պատկերը յեղաշրջուած է: Սուրիական բանակը արտաքին աշխարհէն փակած է Հալէպի ահաբեկչական որջերուն զէնք հայթայթող ճանապարհները: Կ’ողբան Էրտողանը եւ Տաւուտօղլուն…..: Իրենց Հալէպի «եղբայրները» առանձին չլքելու խոստումներ կու տան..: Սուրիական բանակը չի «գրաւեր» Հալէպը, զայն կը պաշտպանէ ահաբեկիչներէն: Քայլ մը, որուն պիտի դիմէր իր սուրբ հողը ազատագրելու ելած որեւէ բանակ: Հասած է Հալէպը ահաբեկիչներէն ազատագրելու պահը:

�