Ռուսիոյ նախագահ Վլատիմիր Փութին յայտնեց, որ Ռուսիա Սուրիոյ մէջ իր զինուորական գործողութիւններուն մէջ չ՛օգտագործեր «իր կարողութեան ամբողջ տարողութիւնը»: «Մենք նաեւ այլ միջոցներ ունինք եւ անհրաժեշտութեան պարագային զանոնք պիտի օգտագործենք», աւելցուց Ռուսիոյ նախագահը:

ՄԱԿ-ի Ապահովութեան խորհուրդը ուրբաթ օր միաձայնութեամբ որդեգրեց Սուրիոյ շուրջ թիւ 2254 բանաձեւը, որ ՄԱԿ-ի վերահսկողութեամբ «ազատ եւ արդար» ընտրութիւններու համար 18 ամսուան ժամկէտ մը կը ճշդէ եւ կը շեշտէ, որ սուրիացի ժողովուրդն է, որ պէտք է ճշդէ երկրին ապագան:

Որոշումը նաեւ կոչ կ՛ուղղէ զինադադարի, սակայն տարակարծութիւն գոյութիւն ունի, թէ ո՛ր խմբաւորումները պէտք է նկատուին ահաբեկչական եւ ըստ այնմ չներառուին զինադադարի համաձայնութեան մէջ: Որոշումը նաեւ կը նախատեսէ վեց ամիսէն «հաւաստի, ներառող եւ ոչ համայնքային կառավարութեան» մը կազմութիւնը, իսկ քաղաքական փոխանցումը պէտք է ըլլայ սուրիական ղեկավարութեամբ: Համաձայնութիւնը նաեւ կը պահանջէ, որ բոլոր կողմերը դադրեցնեն քաղաքայիններու դէմ յարձակումները:

Միւս կողմէ, թրքական «Միլլիյէթ» օրաթերթը կը գրէ, որ Թուրքիոյ վարչապետ Ահմեթ Տաւութօղլու յայտարարած է, որ Թուրքիոյ սահմաններուն անվտանգութիւնը կը սկսի իր սահմաններէն դուրս: «Այնպիսի պետութիւններ, ինչպիսիք են Իրաքը եւ Սուրիան, չեն կրնար վերահսկել իրենց սահմանները: Եթէ մենք չձեւաւորենք անվտանգութեան մթնոլորտ մը, որ կարենայ վերահսկել ՏԱՀԵՇ-ին եւ ՔԱԿ-ին, ապա պիտի չկարենանք ապահովել անվտանգութիւնը նաեւ Թուրքիոյ մէջ: Իրաքի մէջ երրորդական պետութիւնները, որոնք ուժեղ ազդեցութիւն ունին, իրենց զինուորական ներկայութիւնը թաքցնելու համար կը փորձեն ուշադրութիւնը շեղել Թուրքիոյ վրայ: Դուք կը հասկնաք որու նկատի ունիմ «երրորդ կողմ» ըսելով: Եթէ մենք դուրս գանք շրջանէն, ապա դատարկութիւնը պիտի լեցնէ ՏԱՀԵՇ-ը», ըսած է ան:

Տաւութօղլու նշած է, թէ որովհետեւ Փութինի խօսքերը խորհրդային քարոզչութեան բնոյթ ունին, ան այդ խօսքերը լուրջի չ՛առներ: «Այժմ Փութինի մէջ ես չեմ տեսներ Պաղ պատերազմի շրջանը անցած ժողովրդավարական Ռուսիոյ ղեկավարը, այլ խորհրդային հոգեբանութեամբ անձ մը, որ կը խօսի Ռուսիոյ անունով: Փութին կ՛երեւի տակաւին մնացած է «Քէյ.Ճի.Պի.»-ի ծիրին մէջ: Անոր իւրաքանչիւր խօսքը ծիծաղ կը յառաջացնէ: Այդ խօսքերը լուրջ ընդունիլը ինծի համար վիրաւորանք կը նկատեմ», ըսած է ան:

�

�