Արմէնփրես» կը հաղորդէ, որ պաշտօնական այցելութեամբ Ս. Փեթերսպուրկ գտնուող Երեւանի քաղաքապետ Տարօն Մարգարեան Ռուսիոյ հիւսիսային մայրաքաղաքի նահանգապետ Կէորկի Փոլթաւչենքոյի հետ մասնակցած է հայ ազգային դասական երաժշտական դպրոցի հիմնադիր, մեծ երգահան Կոմիտաս վարդապետի յուշարձանի բացման հանդիսաւոր արարողութեան:

Ներկայ գտնուած են նաեւ Ռուսիոյ մէջ Հայաստանի դեսպան Օլեկ Եսայեանը, Ս. Փեթերսպուրկի մէջ Հայաստանի գլխաւոր հիւպատոս Հրայր Կարապետեանը եւ Երեւանի քաղաքապետարանի ներկայացուցչութեան ղեկավար Արմենակ Կարապետեանը, տեղւոյն հայ համայնքի ներկայացուցիչներ, բազմաթիւ փեթերսպուրկցիներ:

Իր խօսքին մէջ Կէորկի Փոլթաւչենքոն կարեւոր նկատած է հայ¬ռուսական դարաւոր բարեկամութիւնը` դիտել տալով, որ Ս. Փեթերսպուրկի մէջ յուշարձանի կանգնեցումը երկու ժողովուրդներու անխախտ բարեկամութեան վկայութիւնն է` յատկապէս նկատի առնելով այն հանգամանքը, թէ հայերուն համար ի՛նչ դեր ու արժէք ունի Կոմիտաս վարդապետը: «Զուգադիպութիւն չէ, որ Կոմիտաս վարդապետի յուշարձանը կը կանգնեցուի Վասիլէոսթրովսքի վարչական շրջանին մէջ, արդարեւ, այս շրջանին մէջ է, որ ի սկզբանէ բնակութիւն հաստատած ու այսօր ալ կ՛ապրին մեծ թիւով հայեր: Մշակութային կեդրոն նկատուող Ս. Փեթերսպուրկի մէջ աշխարհահռչակ երգահանի յուշարձանին տեղադրումը նաեւ օրինաչափ է: Կոմիտասը հայ ժողովուրդի հանճարեղ զաւակն է, անձ մը, որ աշխարհի բազմաթիւ երկիրներուն մէջ քարոզած եւ փառքով պսակած է հայկական երաժշտութիւնը: Անոր մշակոյթը գերած էր աշխարհի բազմաթիւ երաժիշտներ», հաստատած է նահանգապետը:

Ողջոյնի իր խօսքին մէջ Ռուսիոյ մէջ Հայաստանի դեսպան Օլեկ Եսայեան իր կարգին նախ շնորհակալութիւն յայտնած է Ս. Փեթերսպուրկի կառավարութեան` մեծն Կոմիտասի յուշարձանին կանգնեցման առնչութեամբ ցուցաբերած մեծ պատրաստակամութեան համար` նկատել տալով, որ անիկա իրօք երկու ժողովուրդներուն բարեկամութեան լաւագոյն խորհրդանիշն է:

Ողջոյնի խօսքով հանդէս եկած է նաեւ Երեւանի գլխաւոր ճարտարապետ Տիգրան Բարսեղեան: Ապա Երեւանի քաղաքապետ Տարօն Մարգարեանն ու նահանգապետ Կէորկի Փոլթաւչենքոն` աշխարհահռչակ տուտուկահար Ջիւան Գասպարեանի կենդանի նուագակցութեամբ կատարած են յուշարձանի բացումը:

Այնուհետեւ Հայ առաքելական եւ Ռուս ուղղափառ եկեղեցիներու ներկայացուցիչները կատարած են Կոմիտաս վարդապետի յուշարձանի օրհնութեան կարգ, որմէ ետք ծաղիկներ զետեղուած են անոր առջեւ: Կոմիտաս վարդապետի 3,3 մեթր բարձրութեամբ եւ 1,7 մեթր պատուանդանով կրանիթէ յուշարձանին հեղինակը Ռուսիոյ նկարիչներու միութեան անդամ, Ս. Փեթերսպուրկի գեղարուեստա-արդիւնաբերական ակադեմիայի վարիչ Լեւոն Բէյբութեանն է, ճարտարապետը` Մաքսիմ Աթայեանցը:

�