Երեւանի մէջ Օգոստոս 31-ին մահացած սփիւռքահայ գործարար, բարերար Վահագն Յովնանեանի աճիւնափոշին դեռ Պէյրութէն չի տեղափոխուած Հայաստան: Այս մասին NEWS.am-ի թղթակցին յայտնած են «Յովնանեան Ինթերնէյշընըլ» ընկերութենէն:

Թէ ուր պիտի ամփոփուի Յովնանեանի աճիւնափոշին, ընկերութենէն չեն յայտնած` նշելով, որ ատոր մասին յաւելեալ հաղորդագրութիւն պիտի տարածեն:

Յովնանեանին վերջին հրաժեշտը տուած են Երեւանի Կոմիտասի անուան կամերային երաժշտութեան տան մէջ: Այնուհետեւ Վահագն Յովնանեանի մարմինը տեղափոխած են Պէյրութ, ուր` Մեծի Տանն Կիլիկիոյ կաթողիկոսարանին մէջ տեղի ունեցած է անոր հոգեհանգստի եւ վերջին հրաժեշտի արարողութիւնը:

Յիշեցնենք, որ Վահագն Յովնանեան ծնած է 1932-ի Փետրուար 16-ին, Իրաք:

1959-ին հիմնած է (եղբայրներուն հետ) «Յովնանեան եղբայրներ» ընկերութիւնը (եղած է փոխնախագահ), 1969-ին` սեփական անշարժ գոյքի շինարարութեան («Hovhit») ընկերութիւնը: Գործունէութեան ծաւալները աճելուն պէս, ընկերութիւնը ճիւղաւորուած է եւ ստեղծուած քանի մը դուստր ընկերութիւններ` «V.S. Hovnanian Group», «Adelfia Water Company», «Adelfia Sewer Company», «Hovnanian Realty», «Clear Title Agency» եւ «Grandview Cable»: 1985 թուականին Յովնանեան որդիին` Շանթին հետ նախաձեռնած է յաճախականութեան լայն ընդգրկումով հեռահաղորդակցութեան ընկերութիւն, հիմնելով «Cellular Vision» ընկերութիւնը, որ յետագային վերանուանուած է «SpeedUS»:

«Յովնանեան Ինթերնեյշընըլ» (1998 թուականէն) եւ «Յովնանեան Կրուփ» ընկերութիւններուն նախագահն է:

Վահագն Յովնանեանի բարեգործական ծրագիրները նպատակաուղղուած են հայ մշակոյթի զարգացման ու պահպանման, նաեւ Հայաստանի մէջ զբօսաշրջութեանտ զարգացման: Կնոջ` Յասմիկ Յովնանեանի հետ 1976 թուականին Նիւ Միլֆըրտ քաղաքին մէջ (Նիւ Ճըրսի նահանգ) հիմնած է հայկական դպրոց, նպաստած է ԱՄՆ-ի հիւսիս-արլեւելեան հայ համայնքի կրթական, կրօնական եւ մշակութային խնդիրներու լուծման:

2000 թուականին Հայաստանի մէջ հիմնած են Սայաթ Նովայի անուան, 2002 թուականին` «Վահագն» մրցանակաբաշխութիւնները: 2001 թուականի Մայիսին ստեղծած է Հայկական զբօսաշրջութեան զարգացման գործակալութիւնը (ՀՍԶԳ):

Ռիճֆիլտ քաղաքին (Նիւ Ճըրսի նահանգ) Սուրբ Վարդանանց եկեղեցւոյ հոգաբարձուներու խորհուրդի նախագահ, Ամերիկա-Իսրայէլ բարեկամութեան խորհուրդի անդամ:

1998-ին Երեւանի մէջ կառուցած է Վահագնի թաղամասը:

�